ރައީސް އަބްދުﷲ ޔާމީން އަލަށް އުފައްދަވާ ޕާޓީ. ޕީޕަލްސް ނޭޝަނަލް ފްރޮންޓު (ޕީއެންއެފް) އުފައްދަން ހުށަހަޅަން ޖެހޭ 3000 ފޯމު އިލެކްޝަންސް ކޮމިޝަނަށް ހުށަހަޅައިފިއެވެ.

އެ ޕާޓީގެ ފަރާތުން މިމައުލޫމާތު ހިއްސާކޮށްފައިވަނީ އެ ޕާޓީ އުފެއްދުވެމުގައި އިސްކޮށް ހަރަކާތްތެރިވާ މުހައްމަދު މަލީހު ޖަަމާލުއެވެ.

މަލީހު އޭނާގެ އެކްސް ހެންޑްލްގައި ކުރި ޕޯސްޓެއްގައި ހާމަކޮށްފައިވާ ގޮތުގައި ޕީއެންއެފް އުފެއްދުމަށް 3000 ފޯމު މިހާރު ވާނީ އީސީއަށް ހުށަހަޅާފައި ކަމަށާ އުއްމީދަކީ ވީހާވެސް އަވަހަކަށް ޕާޓީ އުފެއްދުމަށް ބާއްވަން ޖެހޭ ޖަލްސާ ބޭއްވުމުގެ ހުއްދަ އީސީއިން ދިނުން ކަމަށެވެ.

މިކަމާ ގުޅިގެން އީސގެ ބަހެއް ހޯދާލަން އެ ކޮމިޝަންގެ ނައިބު ރައީސް އިސްމާއިލް ހަބީބަށް ގުޅާލުމުން ވިދާޅުވީ، 3000 ފޯމު ލިބިފައިވާ ކަމަށާ ފޯމުތަކުގެ ސައްހަކަން ކަށަވަރުކުރުމުގެ މަސައްކަތްކުރަމުން ގެންދަވާ ކަމަށެވެ.

ދުވަސްވަރަކީ މަޖިލިސް އިންތިހާބަށް ތައްޔާރަުރުވުމަށް ވެސް ބުރަ އަދި ގިނަ މަސައްކަތްތަކެއް ކުރަމުން ދާ ދުވަސްވަރެއްކަން ފާހަގަކުރައްވަމުން ހަބީބު ވިދާޅުވީ، ނަމަވެސް 3000 މެމްބަރުންގެ ސައްހަކަން ކަށަވަރު ވީ އެންމެ އަވަހަކަށް ޕާޓީ އުފެއްދުމަށް ބޭނުންވާ ޖަލްސާ ބާއްވަން އީސީއިން ހުއްދަ ދެއްވާނެ ކަމަށެވެ.

ރައީސް ޔާމީންގެ ޕާޓީ އުފެއްދުމަށް 8 މުއައްސިސުން އެމަނިކުފާނު ކަނޑައަޅުއްވާފައިވީ ނަމަވެސް އީސީ ގަވާއިދުގައިވާ ގޮތުން ޕާޓީއެއް އުފެއްދުމަށް ހުށަހެޅޭނީ އެންމެ މުއައްސިސެއްގެ ނަމުގައި ކަމަށްވުމުން، ހުރިހާ ބޭފުޅުންގެ މެދުގައި ކުރެވުނު މަޝްވަރާއަށް ފަހު ނިންމާފައިވަނީ ރައީސް ޔާމީންގެ ދޮށީ ދަރިކަލުން ޒޭން އަބްދުﷲ ޔާމީންގެ ނަންފުޅުގައި އެ ޕާޓީ އުފެއްދުމަށެވެ.