ރައީސް އަބްދުﷲ ޔާމީންއާ ދެކޮޅަށް ހެކި ބަސް ދިން އެއް ހެކި ވެރިއެއް ކަމަށްވާ އަހުމަދު ނާޒިމް މިއަދު ރައީސް ޑރ މުހައްމަދު މުއިއްޒުގެ ސަރުކާރުގައި ހުރި ހިސާބަށް ބަލާލުމުންވެސް ރައީސް މުއިއްޒަު ރައީސް ޔާމީންގެ ޝަރީއަތަށް ނުފޫޒު ފޯރުވި މިންވަރު ހާމަވާ ކަމަށް ރައީސް ޔާމީންގެ އިސް ގާނޫނީ ވަކީލު އަދި ކުރީގެ ނައިބު ރައީސް ޑރ މުހައްމަދު ޖަމީލު އަހުމަދު ވިދާޅުވެއްޖެއެވެ.

ޑރ ޖަމީލު މިފަދައިން ވިދާޅުވީ، "ރައީސް ޔާމީނަށް 2023 ގެ އިންތިޚާބުގައި ވާދަކުރިޔަ ނުދިނީ މުއިއްޒު އަޑީގަ ހުރެގެން" މި މައުޟޫގެ ދަށުން ލިޔެފައިވާ ލިޔުމެއް ހިއްސާކުރައްވާ އެކްސްގައި ކުރެއްވި ޕޯސްޓެއްގައެވެ.

އެގޮތުން ޑރ ޖަމީލު ވިދާޅުވީ، އެ މައުޟޫގެ ދަށުން ލިޔެފައިވާ ލިޔުމަކީ ޝައްކެތް ނެތް މިންވަރެއްގައި އޭގައި ތެދު ހަގީގަތް ހިމެނޭ ލިޔުމެއް ކަމަށެވެ.

އެގޮތުން ރައީސް ޔާމީނުގެ ޝަރީޢަތުގައި ދައުލަތުގެ ފަރާތުން އެމަނިކުފާނާ ދެކޮޅަށް ހެކިދިން އެއް ހެއްކަކީ މަޖިލިހުގެ ނާއިބު ރައީސްކަމަށާ މިއަދު ނާޒިމު ހުރިތަނާ ސަރުކާރުގެ ތެރޭގައި އަދާ ކުރާ ދައުރުން އެކަނިވެސް ރައީސް މުއިއްޒުގެ ޙަގީގަތް ސާބިތުވޭވާ ކަމަށް ވެސް ޑރ ޖަމީލު ވިދާޅުވިއެވެ. ރައީސް މުއިއްޒުގެ މުޅިފަތި ފުށުން ފެންނަން އޮތީ ހުސް ޚިޔާނާތް ކަމަށް ވިދާޅުވެ ޑރ ޖަމީލު ވަނީ ވަރަށް ބޮޑަށް ނުރުހުން އަމާޒުކުރައްވާފައެވެ.

ޑރ ޖަމީލު މިފަދައިން ވިދާޅުވެފައިވާއިރު ރައީސް ޔާމީންގެ މައްޗަށް އެމްޑީޕީ ސަރުކާރުން އުފުލީ ސިޔާސީ ދައުވާތަކެއް ކަމަށް ވިދާޅުވުމަށް ފަހު ވެރިކަމަށް ވަޑައިގެން ރައީސް މުއިއްޒު ގެންދަވަނީ އެމަނިކުފާނުގެ ސަރުކާރުގައިވެސް ރައީސް ޔާމީންގެ މައްސަލަތައް ކުރިއަށް ގެންދަވަމުންކަން ފާހަގަކޮށްލެވެއެވެ. އަދި ރައީސް ޔާމީން އެމަނިކުފާނުގެ މައްސަލަ ރިވިއުއަށް ހުށަހެޅުމުން އެމަނިކުފާނުގެ މައްސަލަ ރިވިއު ނުކޮށް ވަނީ ބޭރުކޮށްލާފައިކަންވެސް ފާހަގަކޮށްލެވެއެވެ.