ރައްޔިތުންގެ މަޖިލީހުގެ ރ.އިނގުރައިދޫ ދާއިރާގެ މެންބަރު އަދި ޕީއެންސީގެ ޕާލިމަންޓްރީ ގްރޫޕްގެ ލީޑަރު އިބްރާހީމް ފަލާހްގެ އާންމުކޮށްފައިވާ މާލީ ބަޔާނުގައި ފަލާހްގެ ބޭންކް އެކައުންޓްގައި އެއްލައްކަ ރުފިޔާ ހުރި އިރުގައި ފަލާހްގެ ނަންމަތީގައި 15 މިލިއަން ރުފިޔާގެ ބީއެމްއެލް ލޯނެއް އޮތުމަކީ ގޯހެއް ކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.

ހޯމަ ދުވަހުގެ ރޭ ޕީއެންއެފްއިން ބޭއްވި އެ ޕާޓީގެ ފްރޮންޓް އޮފީސް ޖަލްސާގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ އެއްލައްކަ ރުފިޔާ ބޭންކް ބެލެންސްގައި ހުރި މީހަކަށް 15 މިލިއަން ރުފިޔާގެ ލޯނެއް ބޭންކް އޮފް މޯލްޑިވްސްއިން ނުދޭނެ ކަމަށެވެ.

މިއީ ކަނޑައެޅިގެން ގޯހެއް ކަމަށާއި މިއީ ފައިސާ ފޮރުވައިގެން އުޅޭކަން ހާމަވާ ކަމެއް ކަމުގައި ރައީސް ޔާމީން ވަނީ ފާހަގަކުރައްވާފައެވެ. މިއާއިއެކު ފަލާހް ފައިސާ ފޮރުވައިގެން އުޅުއްވަނީ ކީއްވެގެންތޯ ރައީސް ޔާމީން ވަނީ އެމަނިކުފާނުގެ ވާހަކަފުޅުގެ ތެރެއިން ސުވާލުކުރައްވާފައެވެ.

މީގެ އިތުރުން، ފައިސާ ފޮރުވައިގެން ގެންގުޅުމަކީ މަނީ ލޯންޑްރިންގ ގެ މައްސަލައެއް ކަމަށް ފާހަގަކުރައްވާ ރައީސް ޔާމީން ވިދާޅުވީ އެއީ ނުހައްގު މުއްސަދިކަން ހޯދުން ކަމުގައެވެ.

ރައްޔިތުންގެ މަޖިލީހުގެ ގިނަ މެންބަރުންނަށް ނަޒާހަތްތެރިކަމުގެ ސަބަބުން އެބޭފުޅުންނަށް "ހަދިޔާ" ލިބިލައްވާ ކަމަށް އެ ބޭފުޅުން ވިދާޅުވާކަމަށާއި މިއީވެސް ވާނުވާ ނޭގޭ ކަންތައްތަކެއް ކަމަށް ރައީސް ޔާމީން ފާހަގަކުރެއްވިއެވެ.

މިއާއިއެކު، އެއްލައްކަ ރުފިޔާ އެކައުންޓްގައި ހުރި މީހަކަށް 15 މިލިއަން ރުފިޔާގެ ލޯނެއް ދީފައިވާ މައްސަލައިގައި ބޭންކް އޮފް މޯލްޑިވްސް ވެސް ޖަވާބުދާރީ ކުރުވަން ޖެހޭނެ ކަމަށް ރައީސް ޔާމީން ވިދާޅުވިއެވެ.

މަޖިލިސް މެންބަރުންގެ ނަޒާހަތްތެރިކަމުގެ އެެއްވެސް މިންވަރެއް އެ ބޭފުޅުންގެ ކިބައިގައި ނެތް ކަމަށާއި ހުރިހާ ކަމެއްވެސް އޮޅުވާލާ ރައްޔިތުންނަށް އޮޅުވާލަމުން އަންނަ ކަންވެސް ރައީސް ޔާމީންގެ ވާހަކަފުޅުގައި ފާހަގަކުރެއްވިއެވެ.