މީޑިއާތަކާއި ނޫސްވެރިން ކޮންޓްރޯލް ކުރުމުގެ ނަމުގައި ރައްޔިތުންގެ މަޖިލީހުން ފާސްކޮށް ރައީސް މުއިއްޒު ތަސްދީގު ކުރެއްވި ބިލަކީ ޚުދުމުހުތާރު ވެރިއެއްގެ ޚުދުމުހުތާރު ސިފަތައް ފޮރުވުމަށް ހަދާފައިވާ ބިލެއްގެ ގޮތުގައި ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.

ޕީއެންއެފްގެ ޓައުން ހޯލް ޖަލްސާގައި ވާހަކަފުޅުދައްކަވަމުން ރޭ ރައީސް ޔާމީން ވިދާޅުވީ ޚުދުމުހުތާރު ވެރިއެއްގެ ކައިރީގައި ތިއްބަވާނީވެސް އެފަދަ މީހުން ކަމަށާއި އެފަދަ ވެރިއަކަށް ވާގިވެރިވާ އަދި އަމުރު ކުރާ ހުރިހާކަމެއް ކުރާނެ މީހުން ކަމަށެވެ.

މިގޮތުން ގައުމުގެ އެކި މުއައްސަސާތަކާއި ވުޒާރާތަކަށް އައްޔަނު ކުރައްވާނީ ސީދާ ރައީސް މުއިއްޒުގެ އިރުޝާދާއި އަމުރަށް ކިޔަމަންވާނެ މީހުން ކަމަށް ވިދާޅުވީވެސް ރައީސް މުއިއްޒު އަމިއްލަފުޅަށް ކަމަށް ރައީސް ޔާމީންގެ ވާހަކައިގައި ފާހަގަކުރެއްވިއެވެ.

މީގެ އިތުރުން، އިންސާނުން އުޅެންވާގޮތާއި މުއައްސަސާތައް ހިންގަންޖެހޭ ގޮތާއި ކުންފުނިތައް ހަރަކާތްތެރިވާންޖެހޭ ގޮތްތައް އަންނަނީ "ކޯޑް ގުޑް ގަވަނަންސް" ގެ ދަށުން ކަމަށާއި ގާނޫނު އަސާސީގެ 15 މާއްދާގައި ބަޔާންވެފައިވަނީ މި ތަންތަން އޮޕަރޭޓް ކުރަމުންދަނީ ރަނގަޅަށްތޯ ކަށަވަރުކުރުމަކީ ރައީސުލްޖުމްހޫރިއްޔާގެ ޒިންމާ ކަމަށް ވިދާޅުވެ މި ގައުމުގެ ރައީސް ކިބައިން އެ މަންޒަރު ނުފެންނަ ކަމަށެވެ.

ގުޑް ގަވަނަންސްގެ ޕްރިންސްޕަލްގެ ދަށުން މިފަދަ މުއައްސަސާތަކުގައި ތިއްބަވާ ވެރިންނާއި މުވައްޒަފުންގެ މައްޒަށް ތަފާތު އެކި ތުހުމަތުތައް ކުރެވުމުން އެކަންކަން ފޮރުވާ އެމީހެއް ދިފާއުކުރުމުގެ ބަދަލުގައި އެކަން ހިނގި ގޮތް ނުވަތަ ނުހިނގާ ކަން ކަށަވަރުކޮށްދިނުމަށް ރައީސް ޔާމީން ވަނީ ގޮވާލާފައެވެ.

އެހެންކަމުން ރައީސް މުއިއްޒު ކުރައްވަން ޖެހޭ ކަމަކީ މިފަދަ ކަންތައްތަކުގެ ވާހަކަތައް ދައްކާ މީހުންގެ ދުލުގައި ޓޭޕް އެޅުން ނޫންކަމަށާއި ރައީސްގެ ޒިންމާގެ ދަށުން ހަގީގަތް ބަލާ އިންސާފުވެރި ތަހުގީގު ހިންގުން ކަމަށެވެ.