އިންޑިއާއިން އައްޑޫގައި އޮޕަރޭަޓު ކުރަމުންދާ މަނަވަރު މަރާތަށް ފޮނުވާލަން ޖެހޭތީ ބަދަލުގައި ބޭނުންކުރާ ހެލިކޮޕްޓަރ ހިފައިގެން އައި އިންޑިއާގެ އަސްކަރީ މަނަވަރު އައްޑޫގައި ބަނދަރު ކޮށްފިއެވެ.

މި ހެލިކޮޕްޓަރ ބަނދަރުކޮށްފައިވަނީ ބުދަ ދުވަހުގެ ވަގުތެއްގައެވެ. އެ ހެލިކޮޕްޓަރ އޮޕަރޭޓް ކުރުމަށް ހަމަޖެހިފައިވަނީ މަދަނީ މީހުންނެވެ.

ޑިފެންސް މިނިސްޓްރީން މީގެ ކުރިން ނެރެފައިވާ ބަޔާނެއްގައި ހާމަކޮށްފައިވަނީ ފޮނުވާލާ ހެލިކޮޕްޓަރުގެ ޓެސްޓު ފްލައިޓުތަކެއް ކުރިއަށްދާނެ ކަމަށެވެ.

އެ ހެލިކޮޕްޓަރުގެ ބަދަލުގައި ގެންނަ އައު ހެލިކޮޕްޓަރު ހިފައިން އަންނަ މަނަވަރު ދާނީ ސީދާ އައްޑޫއަށް ކަމަށް ވެސް މިނިސްޓްރީން ވަނީ ހާމަކޮށްފައެވެ.

ދެ ހެލިކޮޕްޓަރާއި ޑޯނިއާ މަތިންދާބޯޓު ދުއްވަން ރާއްޖޭގައި ތިބޭ އިންޑިއާގެ ސިފައިންގެ ބަދަލުގައި ގެންނަ މަދަނީ މީހުންގެ ފުރަތަމަ ބެޗު ރާއްޖެ އައިސްފައިވާ ކަމަށް ވެސް ޑިފެންސް މިނިސްޓްރީން ވަނީ ބުނެފައެވެ.

މީގެ އިތުރުން ރައީސްގެ ވައުދުފުޅާ އެއްގޮތަށް ލ. ކައްދޫ އާއި ހދ. ހަނިމާދޫގައި ސްޓޭޝަން ކޮށްފައިވާ 2 ޕްލެޓްފޯމުގައި ތިބ އިންޑިއާ ސިފައިން މޭއި މަހުގެ 10ގެ ކުރިން ފޮނުވާލުމުގެ ކަންކަން އޮމާންކަމާއި އެކު ފުރިހަމަކޮށް ނިންމުމަށްޓަކައި ފުރިހަމަ ކުރަން ޖެހޭ މަޝްވަރާތަކާއި ކުރަން ޖެހޭ ކަންކަން ޑިޕްލޮމެޓިކް ހަމަތަކާއި އުސޫލުތަކުގެ ތެރެއިން ސަރުކާރުން ކުރަމުން އަންނަ ކަމަށްވެސް ޑިފެންސް އިން ވަނީ ހާމަކޮށްފައެވެ.

ރައީސް މުހައްމަދު މުއިއްޒުގެ ސަރުކާރަކީ އިންޑިއާގެ އަސްކަރިއްޔާގެ ބާރުން ރާއްޖެ މިނިވަންކުރާނެކަމުގެ ވައުދާ އެކު އައި ސަރުކާރެއް ނަމަވެސް ކީހާ ޅެން ފަރެިއްސަށް ބަދަލުވެ އިންޑިއާ އަސްކަރިއްޔާ ފޮނުވާލާ އޭގެ ބަދަލުގައި ސިވިލު އިންޑިއަނުން ހެލޮކޕްޓަރާ ޑޯނިޔާ އޮޕަރޭޓުކުރަން ބައިތިއްބަން އިންޑިއާ ސަރުކާރާ ރާއްޖެ ސަރުކާރުން އެއްބަސްވެފައިވުމާ އެކު ގިނަ ބައެއްގެ ނުރުުހުމާ ފާޑުކިޔުންވަނީ ސަރުކާރަށް އަމާޒުވެފައެވެ.

ރާއްޖޭގައި އެ އުޅަނދުތައް އޮޕަރޭޓުކުރާނެވަރުގެ ގާބިލުކަން ހުރި ޕައިލެޓުން ތިބިކަން މީގެ ކުރިން ރައީސް އަބްދުﷲ ޔާމީންވަނީ އެތައް ފަހަރެއްގެ މަތިން ހާމަކުރައްވާފައެވެ. އަދި އެމަނިކުފާނުގެ ޒައާމަތުގައި ދިވެހިންނަށް އެ ފުރުސަތު ދޭން އިންޑިއާއިން އެއްބަސްނުވުމުން މަތިންދާ ބޯޓާ ހެލިކޮޕްޓަރުވެސް އަނބުރާ ގެންދަން އަންގާ އެ އުޅަނދުތައް ރާއްޖޭގައި އޮޕަރޭޓުކުރުންވެސް ހުއްޓުވިއެވެ.