އެމްޕީއެލްގެ ހުޅުމާލެ ބަނދަރުގައި ބަހައްޓާފައި ހުއްޓާ ވަގަށް ނެގި 13 މިލިއަން ސިނގިރޭޓުގެ މައްސަލައިގައި ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) އަށް ކަމާ ބެހޭ އިދާރާތައް ހާޒިރުކުރުން ފަސްކޮށްފި އެވެ.

މި މައްސަލާގައި ހޯމް މިނިސްޓްރީ އާއި ފުލުހުންގެ އިތުރުން ކަސްޓަމްސް އާއި އެމްޕީއެލުގެ އިސް ބޭފުޅުން އާދީއްތަ ދުވަހު ހާޒިރުކޮށް ސުވާލުކުރަން ތާވަލުކޮށްފައި އޮތް ނަމަވެސް 241 އެ ބައްދަލުވުން ހަފުތާއަކަށް ފަސްކޮށްފައިވާކަން މަޖިލީހުން ވަނީ ކަށަވަރުކޮށްދީފަ އެވެ.

މަޖިލީހުގެ މީޑިއާތަކުން ނޫސްވެރިންނަށް ފޮނުވި މެސެޖެއްގައި ބުނީ މި ބައްދަލުވުން ފަސްކުރީ ދިރާސާކުރަން ނިންމާފައިވާ މައްސަލަ އާއި ގުޅިގެން މިވަގުތު ކޮމިޓީ ބައްދަލުވުމެއް ބާއްވައިފިނަމަ އެ މައްސަލައިގެ ތަހުގީގަށް ހުރަސް އެޅިދާނެ ކަމަށް ބެލެވޭތީ ކަމަށެވެ.

މި މައްސަލާގައި މިހާތަނަށް ހަތަރު މީހަކު ހައްޔަރުކޮށް 12 މީހަކު ވަނީ ފުރުން މަނާކޮށްފަ އެވެ.

ހައްޔަރުކުރި މީހުންގެ ތެރޭގައި ހިމެނެނީ އަމިއްލަ ވިޔަފާރިވެރިޔެއް ކަމުގައިވާ އަހުމަދު އާރިފު އާއި މުހައްމަދު ވަހީދު އަދި ކަސްޓަމްސްގެ ކުރީގެ ސީނިއާ އޮފިސަރެއް ކަމުގައިވާ މުއާޒު އަލީ އަދި ހުޅުމާލޭ ޕޯޓުގައި މަސައްކަތްކުރާ ކަސްޓަމްސްގެ ސީނިއާ އޮފިސަރެއް ކަމުގައިވާ ހދ. ވައިކަރަދޫ ޒިވާރު އިސްމާއީލް އެވެ.