މީޑިއާތައް ކޮންޓްރޯލް ކުރުމުގެ ގޮތުން މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަނުގެ ރައީސް އައްޔަނުކުރުމުގެ މައްސަލަ ދިރާސާކުރުމަށް މަޖިލީހުގެ މިނިވަން މުއައްސަސާތަކުގެ ކޮމިޓީއަށް ފޮނުވައިފިއެވެ.
މޯލްޑިވްސް މީޑިއާ އެންޑް ބްރޯޑްކާސްޓިންގ ރެގިއުލޭޝަން ޤާނޫނުގެ ދަށުން މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނަށް ރައީސަކު އައްޔަނު ކުރާނީ ރައްޔިތުންގެ މަޖިލީހުންނެވެ.
މީޑިއާ ކޮމިޝަން އެކުލެވިގެންވަނީ ހަތް މެންބަރުންގެ މައްޗަށެވެ. އެއީ ރައްޔިތުންގެ މަޖިލީހުން އެކަމަށް ހުޅުވާލައިގެން ނެގި ވޯޓަކުން ހޮވުނު ތިން މެންބަރުންގެ އިތުރުން ބްރޯޑްކާސްޓަރުންނާއި އެހެނިހެން މީޑިއާތަކުން އިންތިހާބު ކުރާ ހަތަރު މެންބަރުންނެވެ.
އެގޮތުން މަޖިލީހުން އެ ކޮމިޝަނަށް އައްޔަނުކޮށްފައިވަނީ މުޙައްމަދު ފަރުސަތާއި ޞަފާ ޝަފީގާއި އާމިނަތު ސަރާޙަތު ޢިއްޒަތެވެ.
އެކޮމިޝަނަށް ބްރޯޑްކާސްޓަރުން ތަމްސީލުކުރާ ދެ މެންބަރުންގެ ގޮތުގައި އިންތިހާބުވެފައިވަނީ ޢަބްދުލްޢަޒީޒް އިބްރާހީމާއި ޒަމްޢަތު އަޙްމަދު ވަޙީދެވެ. އަދި އެހެނިހެން މީޑިއާތައް ތަމްސީލުކުރާ މެންބަރުންގެ ގޮތުގައި އިންތިހާބުވެފައިވަނީ ސިމާޙާ ނަސީމާއި ޙުސައިން ޘަޤީފެވެ.
މީޑިއާ ކޮމިޝަނުގެ ރައީސަކީ މަޖިލީހުން ކަނޑައަޅާ ފަރާތެއް ނަމަވެސް، ކޮމިޝަނުގެ ނައިބު ރައީސް ކަނޑައަޅާނީ ކޮމިޝަނުގެ މެންބަރުންނެވެ.
