މާލެ ސިޓީގެ ވިލިމާލެ ދާއިރާގެ ކައުންސިލަރ ނަހުލާ އަލީ ރިޝްވަތު ހުށަހެޅުއްވި ކަމަށް ހުޅުމާލެ ދާއިރާގެ ކައުންސިލަރ އަލީ އައިމަން ވިދާޅުވެއްޖެއެވެ.

އައިމަން މިފަދައިން ވިދާޅުވެފައިވަނީ މާލެ ސިޓީ ކައުންސިލްގެ 4 ވަނަ ދައުރުގެ 217 ވަނަ ރަސްމީ އާއްމު ޖަލްސާގައި ވާހަކަ ދައްކަވަމުންނެވެ.

އައިމަން ވިދާޅުވީ ނަހުލާ ބައެއް ކައުންސިލަރުންނަށް ރިޝްވަތު ހުށަހަޅުއްވާފައިވަނީ ބްރެޑް މެޓަރސް ރެސްޓޯރެންޓްގެ ތެރޭގައި ކަމަށެވެ. އެއީ ހުޅުމާލެކަމެއް ނުވަތަ މާލެ ކަމެއް ނަމަވެސް ސާފުކޮށްދެއްވާފައި ނުވެއެވެ.

އެ ބައްދަލުވުމުގައި އައިމަން ވަނީ އިވެލުއޭޝަން ޕްރޮސެސްއަށް ލަފާދޭ ކޮމިޓީގެ މައްސަލަ ބޮޑުވެފައިވާ ކަމަށް ވިދާޅުވެ ކޮމިޓީ އުވާލަން ފެންނަ ކަމަށް ވިދާޅުވެފައެވެ.

އައިމަން ކޮމިޓީ އުވާލާ ވާހަކަ ދެއްކެވިއިރު މާލެ ސިޓީ ކައުންސިލްގެ ބައްދަލުވުމުގައި ވަނީ އިވޭލުއޭޝަން ކޮމިޓީ އުވާލަން ނިންމާފައެވެ.

ނަހުލާ ބޭނުންވީ ގާނޫނާއި ގަވާއިދުގެ ބޭރުން އިވެލުއޭޝަން ލަފާދޭ ކޮމިޓީގެ މަސައްކަތް ކުރަން ކަމަށް އައިމަން ވިދާޅުވިއެވެ. ނަމަވެސް އެކަން ކާމިޔާބު ނުވުމުން އެކަމާ ހިތް ހަމަ ނުޖެހި އެކަން ހަޖަމުނުވެގެން އެ ކޮމިޓީ އުވާލަން ނަހުލާ ބޭނުންވީ ކަމަށް އައިމަން ވިދާޅުވިއެވެ.

އައިމަން ވަނީ ނަހުލާ އޭނާއަށް ރިޝްވަތު ހުށަހެޅުއްވި ކަމަށް ހެކިވާނެ ހެކިވެރިން މާލެ ސިޓީ ކައުންސިލްގައި ތިބޭނެ ކަމަށް ވިދާޅުވެފައެވެ.

އައިމަންގެ މިފަދަ ބޮޑު ތުހުމަތެއް ނަހުލާއަށް އަމާޒުކުރި ނަމަވެސް އާންމުކޮށް އަމިއްލަ ދިފާއުގައި އަބަދުވެސް ނުކުންނަ ނަހުލާމިކަމަށް ޖަވާބެއް ނުވަތަ ރައްދެއް ވެސް އަދި ދީފައި ނުވެއެވެ.