އެމްޕީއެލް ބަނދަރު ސަރަހައްދު ބޭރުން ކޮޅުވެއްޓިއެއް ބަންޑުންޖަހާލި ހާދިސާގައި ވަރަށް ބޮޑަށް އަނިޔާވެގެން އައިޖީއެމްއެޗުގައި ފަރުވާދެމުން އައި ދިވެހި ޒުވާނާ ރޭ ނިޔާވެއްޖެ އެވެ.

މި ހާދިސާގައި ނިޔާވީ އެމްޕީއެލްގެ މުވައްޒަފެއް ކަމަށްވާ ގއ. ގެމަނަފުށީ، ދިލްބަހާރުގޭ، އަލީ އަފްލާހު އަބްދުﷲ އެވެ. އުމުރުން 25 އަހަރުގެ އެ ޒުވާނާ ނިޔާވީ ރޭގެ ދަންވަރުގެ ވަގުތެއްގަ އެވެ.

އެމްޕީއެލްއާ ދިމާ ބޭރުގައި ކޮޅުވެއްޓިއެއް ބަންޑުން ޖަހާލި ކަމުގެ މައުލޫމާތު ލިބުނީ އިއްޔެ މެންދުރު ފަހު 15:44ހާއިރު ކަމަށް ފުލުހުން ވިދާޅުވިއެވެ.

އެ ހާދިސާގައި ހަ މީހަކަށް އަނިޔާވިއެވެ. ފުލުހުން ފަހުން ވިދާޅުވި ގޮތުގައި އެ ހާދިސާގައި އަނިޔާވީ ހަތަރު ދިވެހިންނަށާއި ދެ ބިދޭސީންނަށެވެ. އެ މީހުންނަށް ފަރުވާ ދިނުމަށް ގެންދިޔައީ އައިޖީއެމްއެޗްއަށެެވެ.

އެ ހާދިސާގައި އިއްޔެ އެކަކު ވަނީ ނިޔާވެފައެވެ. އެއީ ބަންގްލަދޭޝްއަށް ނިސްބަތްވާ މީހެކެވެ.

އަފްލާހްގެ ކަށުނަމާދު މިއަދު މެންދުރު ފަހު އާސަހަރާ މިސްކިތުގައި ބާއްވާ ގޮތަށް ވަނީ ހަމަޖައްސާފައެވެ.

މީގެ އިތުރުން، މާލެއިން ފުރައިގެން ރީތިރަށް ރިސޯޓަށް ދަތުރުކުރި ކޮޅުވެއްޓިއެއް ވެސް މިދިޔަ މަހުގެ 15 ވަނަ ދުވަހުގެ ރޭ ބަންޑުން ޖަހާލައި، ތިން މީހަކު މަރުވެފައި ވެ އެވެ. އޭގެ ތެރެއިން އެކަކީ ވެސް ދިވެއްސެކެވެ.