އިއްޔެގެ ވަގުތެއްގައި މުޅި ރާއްޖެ ގުގުމާލީ ރައީސް މުހައްމަދު މުއިއްޒުގެ ވައުދެއް ފުއްދިކަމުގެ ވާހަކައިންނެވެ.

ސަރުކާރަށް ސަނާ ކިޔުމަށް މުސާރަ ދިފައި ތިބޭ ކަމަށް ގިނަ ބަޔަކު ބުނާ ސޮރުންތަކަކާ އަންހެން ކުދިންތަކެއްގެ އިތުރުން ދައުލަތުގެ އިސް ބޭފުޅުން ވެސް ނިކަން ފަހުރުވެރިވެފައި ދިޔައީ އެ ވާހަކަ ޓްވީޓު ކުރަމުންނެވެ.

އެގޮތުން ރާއްޖޭގައި މެޑިކަލް އިވެކުއޭޝަންއަށް ބޭނުންވާ އެއާރ އެމްބިއުލެންސް އަމިއްލަ ގައުމުގެ އުޅަނދެއްގައި ފަށާ ރައީސް މުއިއްޒު އެ ވައުދު ފުއްދި ކަމަށް ބުނެ ނިކަން ބަޔަކު ސެލެބްރޭޓުކުރަމުން ދާތީ ނާ މި ވާ ގޮތެއް ބަލާލަން ނިކަން ހިތް ވިއެވެ. އެއީ މިހާ ތަނަށް އަދި ފުއްދި ކަމަށް ބުނާ ހުރިހާ ވައުދެއް ހުރީ އަމާ ބުނީތީ ފަރަށް ދާ އުސޫލުންވެސް ކަމަށްވެފައި އޮތުމުންނެވެ.

ކޮންމެއަކަސް މި ބެލި ބެލުމުން އެނގިގެން ދިޔައީ ދަވާދު އައުކޮށް ނެރެއިވަނީ 24 އަހަރުވެފައި އޮތް ބައު ބޯޓެއްކަމެވެ.

އެހެންކަމުން ވެރިން މޭގައި އަތް ޖަހާލާފައި ފަހުރުވެރިކަމާ އެކު މުޅި ދުނިޔެއަށް އިއުލާންކުރަމުން ނެރުނު އެ ބޯޓުގެ ހާލަތަކީ ކޮބައިކަމެއް އެނގެނީ ކިތައް މީހުންނަށް ބާއެވެ.

ދައްކާލީ އަވާމެންދުރެކެވެ. އެއަރ އެމްބިއުލެންސެކޭ ކިޔާ ނެރެ އުދުއްސުވީ މީގެ ކުރިން ގްރައުންޑްކޮށްފައި އޮތް ނާލު ބައްތެއްޔެއްކަން އެނގެނީ ކިތައް މީހުންނަށް ހެއްޔެވެ.

ކުޑައިރު ޓީވީއެމްއިން ދެއްކި ސަޅި ބައިސާގެ އެޕިސޯޑެއްހެން ހީވެގެން ދިޔަ މި އެއަރ އެމްބިއުލަންސްގެ ފޮޓޯތައް ދިމާނުވެ އަތަށް ގޮވީ ދަތުރުތައް ފެށުމުގެ މާ ކުރިންނެވެ.

ހުރިހާ ރަށަކަށް ދަތުރުކުރެވޭނެކަމަށް ބުނެ ސަރުކާރުން މެޑަލް ޖެހިއިރު ކޮންމެ ރަށެއްގައި މޯލްޑިވިއަންގެ ނާލު ބައްތެލި ލޭންޑް ކުރާނެ ގޮތެއް ސަރުކާރުން ހެދި ބާއެވެ؟ އެންމެ ކުޑަ މިނުން ކޮންމެ ރަށެއްގައި ރަންވޭއެއް އޮންނަން ޖެހޭ އިރު މިހާރު ރާއްޖޭގެ މީހުން ދިރިއުޅޭ ރަށްތަކުގެ ތެރެއިން ރަންވޭ އޮތީ ކިތައް ރަށުގައި ތޯ ތިޔަ ބޭފުޅުން ނިކަން ހިސާބު ޖައްސަވަބައްލަވާށެވެ. 50X4 ވީމާ 2 ލައްކަ ވާކަމަށް ވިދާޅުވި މުސްތަޝާރުން ތިބި ސަރުކާރެއްވީމާ އަޅުގަޑުމެންގެ ހިސާބާ ދިމާނުވަނީތޯއްޗެކެވެ. ރާއްޖެއަކީ ހިންދުމާ ކަނޑުތެރެއަށް އުކަލާފައިވާ ރަންމުތްތަކެއްގެ މައްޗަށް އޮތް ޖަޒީރާތަކަށްވާއިރު މިކަމާ ސަރުކާރުން ވިސްނާލިތޯއެވެ. އޭވިއޭޝަން ދާއިރާގައި ކައްޕިތާނުންގެ ލަގަބު ލިބިވަޑައިގެން ތިއްބެވި ވަޒީރުން ތިއްބެވިއިރު މިއީ ހަމަ ރައްޔިތުންނަށް އެންމެ ހެޔޮވަރު އެއާރ އެމްބިއުލަންސެއްތޯ އޭވިއޭޝަން ވަޒީރު ނަމަހީވެސް އަމިއްލަ ޒަމީރާ ސުވާލުކޯށްލުން ކީއްތޯއެވެ. ޔަގީނުންވެސް އިއްޔެ އެ ނެރުނު އެއާ އެމްބިއުލަންސް ރާއްޖޭގެ ކޮންމެ ރަށަކަށް ޖެއެްސޭނީ އެއީ ނާތު ބައްތެޔަކަށް ވެގެންނެވެ.

މެޑިކަލް އެމަރޖެންސީއެއްގައި ބޭނުންކުރާނެ އެއްވެސް ވަސީލަތެއް އަދި އާލާތެއްްވެސް ނެތި އޮތް ނާލު ބައްތެއްޔެއް، އެއާރ އެމްބިއުލެންސެކޭ ކިޔާ ދަވާދު އައުކޮށްގެން ނެރެ ރައްޔިތުންނަށް ދޯކާ ދެނީ ހިންޏަށް ހަކުރު އޮޅުވާލާ ބިދައިންނެވެ.

އެހެންކަމުން ބާދަނގަޑުގައި ކުލަލައި އެއަށް އެމަޖެންސީ އެމްބިއުލާންސް ކިޔައި ބައިސާ ކެނޑީމާ ދެން ރައްޔިތުން އަންނާނީ އިހުނަށްވުރެ ބޮޑަށް ރުޅިއެވެ. ކޮންމެ ކަމެއްގައި މަކަރާ ހީލަތެވެ. ދުނިޔެ ކަނީ މަކަރާ ޖަހައިގެންނޭ މުސްކުޅީން ބުނެ އުޅުނަމަވެސް މިދެން ތަންފުކެއް ބޮޑުވަރެވެ. ރައީސް އަބްދުﷲ ޔާމީންވެސް މިނިވަން ކުރަން ވައުދުވެ ދެން ފެނުނީ އެކަމަށްވެސް މަކަރު ހެދިތަނެވެ.

ފަރސްޓް ކިލާހުގައި ދަތުރުނުކުރާނަމޭ ވިދާޅުވެ އެކަމަށް ވެސް ހެދީ މަކަރެވެ. މިހާރު އެމްބިއުލަންސް ނެރެފީމޭ ވިދާޅުވެ މިކަމަށްވެސް މަކަރެވެ.

ބާ ދަގަނޑުގައި ކުލަ ހާކައިގެން ފޭކް އެމްބިއުލާންސް އެއް ދިވެހިންނަށް ދައްކާއިރު، ރައީސް މުއިއްޒު އަރާ ކޮންމެ ޖަލްސާއެއްގައި މިހާރު ވިދާޅުވަމުންދާ އެއް ވާހަަކއެއް އެބައޮެވެ. އެއީ ކުރިއަށް އޮތްތާގައި ސަބްސިޑީ ދޭނީ ވަކި ބަޔަކަށް ކަމެވެ. އެ ކަނޑާލާ ސަބްސިޑީ ތެރޭގައި އާސަންދަ ދިނުންވެސް ކަނޑާ ނުލައިފިއްޔާ ވާ ރަގަޅެވެ.

ކޮންމެ އަކަސް ވައުދު ފުއްދާ ބޭފުޅަކަށް ވާން ބޭނުމޭ ވިދާޅުވެ އަމާބުނީތި ފަރަށް ދާ އުސޫލުން ބަފާ ބުނީތީ ރަންކިޔާ އުސޫލުން ވައުދު ފުއްދީމާ ދެންވާނީ ފޫނެތް ފާއްޔަކަށް ފެންފުރުމަށެވެ. ރައީސް މުއިއްޒު އެވެ. ތިޔަ ދެއްވީ އެއާރ އެމްބިއުލެންސެއް ނޫނެވެ. ތިޔަ ދެއްވީ 24 އަަހރު ގައުމީ އެއާރލައިންގެ ފްލީޓުގައި ބޭނުންނުކޮށް އޮތް ނާލު ބައްތެޔެކެވެ. ނާލުި ބައްތެއްޔަކާ އެއާރ އެމްބިއުލެންސަކާ ހުންނާނެ ތަފާތު މަނިކުފާނު ނަންގަވައިގެން ހުންނެވި ކުރަހާ ޕީއެޗްޑީއިން އެނގިވަޑައިނުގަންނަވަނީ ދެއްތޯއެވެ.