އަންނަ އަހަރަށް ސަރުކާރުން ކަނޑައަޅާފައިވާ ބަޖެޓަށް ބަލާލީމަވެސް އެއީ ޑެފިސިޓް ބަޖެޓެއްކަން އެގިލައްވާ ކަމަށް ރައީސް ޔާމީން އަބްދުލްގައްޔޫމް ވިދާޅުވެއްޖެއެވެ.

ޕީއެންއެފްގެ ޓައުން ހޯލް ޖަލްސާގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ   އަންނަ އަހަރަށް ފާސްކޮށްފައިވަނީ 64 ބިލިއަން  ކަމަށްވާއިރު ރެވެނިއު އެންޑް ގްރާންޓްގެ ގޮތުގައި ހިމަނާފައިވަނީ 40 ބިލިއަން ކަމަށެވެ. ނަމަވެސް މިއަހަރުގެ ޖުމްލަ ދަރަނި 33 ބިލިއަން އަރާ ކަމަށާއި ޑެފިސިޓް ބަޖެޓެއް އޮތް އިރު ގައުމުގެ އިގްތިސާދު އޮތީ ރަނގަޅު މިސްރާބެއްގައި ކަމަށް ބުނެ ސަރުކާރުން ރައްޔިތުންނަށް އޮޅުވާލާ ކަމަށް ރައީސް ޔާމީން ވިދާޅުވިއެވެ.

ސަރުކާރުގެ މިހާރުގެ މުސާރައަށް މަހެއްގެ މައްޗަށް ގާތްގަނޑަކަށް ދެ ބިލިއަން އަރާ އިރު އަހަރަކަށް 24 ބިލިއަންވަރު އަރާނެ ކަމަށް ފާހަގަކުރައްވަާ ރައީސް ޔާމީން ވިދާޅުވީ ރިކަރަންޓް ޚަރަދަށް ބާކީ އޮންނާނީ 10 ވަރަކަށް ބިލިއަން ކަމަށެވެ.

މީގެ އިތުރުން، ބޭރު ގައުމުތަކުން އެންމެ ގިނައިން ގްރާންޓް ދީފައި ހުރީ އިންޑިއާއިން ކަމަށާއި ނަމަވެސް އެ ފައިސާވެސް ނުދައްކާ ދަރަނި ވަނީ އިތުރު ކަމަށް އެމަނިކުފާނުގެ ވާހަކައިގައި ފާހަގަކުރެއްވިއެވެ.

ދައުލަތުގެ ޚަރަދުތައް މި އަދަދުތަކުން ފޫ ނުބެއްދޭނެ ކަމަށާއި ބަޖެޓަކީވެސް ބޮޑު ސްކޭމްއެއް ކަމަށް ރައީސް ޔާމީން ސިފަކުރެއްވިއެވެ. އަދި ވެލާބިސް އަޅާ އުސޫލުން މުއިއްޒު ގެންދަވަނީ ވަޒީފާތައް ބަހަމުން ކަމަށާއި އަންނަ އަހަރުގައި އެއްވެސް މަޝްރޫއެއް ނުހިނގާނެ ކަމަށް ރައީސް ޔާމީން ފާހަގަކުރެއްވިއެވެ. އެހެންކަމުން މި 40 ބިލިއަނުން ދެކޮޅު ނުޖެހޭނެ ކަމަށް މި ބުނަނީ ސަރުކާރުން ހުށަހެޅި ބަޖެޓުގެ ހިސާބުތަކުން ކަމަށް އެމަނިކުފާނު ވިދާޅުވިއެވެ.