ސަރުކާރު ޖަވާބުދާރީ ކުރުވުމުގެ ޒިންމާ އޮތް ފަރާތްތަކުގެ ހިލަމެއްވެސް ނެތް ކަމަށް ކެންދޫ ދާއިރާގެ ކުރީގެ މެމްބަރު އަލްއުސްތާޛު އަލީ ހުސެއިން ވިދާޅުވެއްޖެއެވެ.

އަލީ މިފަދައިން ވިދާޅުވެފައިވަނީ އެކްސްގައި ކުރެއްވި ޕޯސްޓެއްގައެވެ.

ބިޑަކާ ނުލާ މަޝްރޫއުތައް މިސް މީހުންނަށް އެވޯޑުކޮށް ހަވާލުކުރުމަކީ ދިވެހރާއްޖޭގެ މާލިއްޔަތު ގާނޫނާ ޚިލާފުކަމެކެވެ. އެ ގާނޫނާ ޚިލާފަށް ރައީސް މުހައްމަދު މުއިއްޒުގެ ސަރުކާރުން ވަނީ އިހަކަށް ދުވަހު 205 މަޝްރޫއަށް ވުރެ ގިނަ މަޝްރޫއުތަކެއް ޕްރައިވެޓު ކުންފުނިތަކަކަށް ދޫކޮށްލާފައެވެ. 2.8 ބިލިއަން ރުފިޔާގެ އެ މަޝްރޫއުތައް ގިނައިން ދީފައިހުރީ ސަރުކާރުގެ ތެރޭގައި ތިއްބެވި ބޭފުޅުންގެ މަސްލަހަތު އޮތް ކުންފުނިތަކަކަށެވެ. އޭގެ ތެރޭގައި މަޖިލިސް ޖަވާބުދާރީ ކުރުވަން އޮތް އެއް ބާރު ކަމުގައިވާ ރައްޔިތުންގެ މަޖިލީހުގެ ޕީއެންސީގެ މެމްބަރުން ހިމެނެއެވެ.

މިކަން މިހެން ހިނގާފައިވާ ދަނޑިވަޅެއްގައި އަލީ ވަނީ ރައީސް މުއިއްޒަކީ ބިޑަކާނުލާ މާލޭގެ މަގުތައް ވިއްކާލި މީހެއްގެ ގޮތުގައި ތުހުމަތުކުރެވޭ ފަދަ މޭރުމަކުން ލިޔުއްވާފައެވެ. އެގޮތުން ބިޑަކާނުލާ މާލޭގެ މަގުތައް ވިއްކާލި މީހަކަށް ރައީސުލްޖުމްހޫރިއްޔާ ކަމަށް ކުރިމަތިލުމުގެ ފުރުސަތު ލިބުނީ ކީއްވެތޯ އައްސަވާ އަލީ އެކްސްގައި ސުވާލުކުރައްވާފައިވެއެވެ.

ހަމައެހެންމެ ބިޑަކާ ނުލާ 2.7 ބިލިޔަން ރުފިޔާގެ ޕްރޮޖެކްޓުތައް އެ ރައިސްގެ ސަރުކާރުން ބަހާލާއިރު، އެ ސަރުކާރު ޖަވާބުދާރީ ކުރުވުމުގެ ޒިންމާ އޮތް ފަރާތްތަކުގެ ހިލަމެއްވެސް ނެތް ކަމަށް އަލީ ވަނީ ވިދާޅުވެފައެވެ.

އަލީ މިފަދައިން ވިދާޅުވެފައިވާއިރު ރައްޔިތުންގެ މަޖިލީހުގައި ޕީއެންސީގެ ސުޕަރ މެޖޯރިޓީ އޮތުމުން އެކި އެކި ގާނޫނުތަކަށް ސަރުކާރުން ބޭނުންވާ އިސްލާހުތަކާ ބަދަލުތައް ގެނެސް ހިތުހުރި ގޮތަކަށް ވެރިކަން ކުރުމަށް މަގު ކޮށަމުންދާކަމަށް ގިނަ ރައްޔިތުން ތުހުމަތުކުރެއެވެ.