ދިވެހިރާއްޖެ މިހާ ބޮޑު ފަސާދަކަމެއްގެ ތެރޭގައި އެނބުރޭއިރު ރާއްޖޭގެ ސަލަފީން ނުވަތަ އިލްމުވެރިން ބަހެއް ނުބުނެ ހަނު ތިއްބެވުމަކީ އެ ބޭބޭފުޅުން ދާއިމަށް ހަނު ތިއްބެވުމަށް ނިންމައިގެން ތިބުން ކަމަށް ސިފަވާ ކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.

ޕީއެންއެފްގެ ޓައުން ހޯލް ޖަލްސާގައި ރޭ ވާހަކަފުޅު ދައްކަވަމުން އެމަނިކުފާނު ވަނީ ރާއްޖޭގެ ފަނޑިޔާރު ސިސްޓަމަށްވެސް ބޮޑެތި ފާޑުކިޔުންތައް އަމާޒުކޮށްފައެވެ.

މިގޮތުން، އެމަނިކުފާނަށް ކުރީގެ ރައީސެއްގެ އެދުމުގެ މަތިން ޙަރާން ހުކުމެއް ޖައްސަވާފައި އެ ރައީސަކު ދިން އުމްރާ ދަތުރެއްގައި ވަޑައިގެން އެ ފަނޑިޔާރު އުމްރާ ކުރެއްވިއިރު އެމަނިކުފާނަށް ލިބުނު ގެއްލުމުގެ ބަދަލު އެކަމުން ލިބޭނެތޯ ވަނީ ސުވާލުއުފައްދާފައެވެ.

ދިވެހިރާއްޖޭގައި އިސްލާމީ ޝަރީއަތެއް ކުރައްވާއިރު ފަނޑިޔާރުންނަށްވެސް ނުހައްގު ހުކުމްތައް އެކި މީހުންނަށް ޖައްސަވާއިރު އޭގެ ހުރި ގެއްލުމާއި އަޛާބު އެގިލައްވާނެ ކަމަށާއި ނަމަވެސް ވަކި މަންފާތަކެއް ހާސިލުކުރުމުގެ ނިޔަތުގައި އެފަދަ ދެރަ އެމަނިކުފާނު ހިމެނޭހެން އެކި މީހުންނަށް މިހާރުގެ ސަރުކާރުންވެސް ދެމުންދާ ކަމަށް ސިފަކޮށްފައިވެއެވެ.

ރާއްޖޭގެ ޖުޑީޝިއަރީ ކަންކަން މި ލެވެލްއަށް ގޮސްފައިވާއިރު ރާއްޖޭގެ އިލްމުވެރިން ހަނު ތިއްބަވަނީ ކީއްވެގެންތޯވެސް ރައީސް ޔާމީން ސުވާލުކުރައްވާފައެވެ.

ހައްގު ބަސް ނުބުނުމަށް ހަނު ހުރުމުގެ ހައްގު ބޭނުންކޮށްގެން އިލްމުވެރިން ތިއްބަވަނީ ކަމަށް އެމަނިކުފާނު ވިދާޅުވިއެވެ. އަދި ރާއްޖޭގެ ހުރިހާ ކަމެއް ހެޑަށް އޮޅި އޮޅުން ބޮޅުން ވެފައިވާ ކަމަށްވެސް އެމަނިކުފާނު ފާހަގަކުރެއްވިއެވެ.