މުއިއްޒާއި މުއިއްޒުގެ ކައިރީގައި ތިއްބަވާ ބޭފުޅުންގެ މައްސަލަތައް ތަހުގީގު ކުރެވޭ ދުވަހަކުން އިބިލީސްވެސް ފިލާނެ ކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.
ރައީސް ޔާމީން ވިދާޅުވީ މި ސަރުކާރުން ދޭ މާފެއް އެމަނިކުފާނު ބޭނުން ނުވާނެ ކަމަށާއި އެމަނިކުފާނާއި މެދު މި ސަރުކާރުން ނުހައްގުން ކޮންމެ ގޮތަކަށް ކަންތައް ކުރެއްވިއަސް އެމަނިކުފާނު ހުންނެވީ ރައްޔިތުންނާއި އެކު ސާބިތުވެ ކަމަށެވެ.
މިއާއިއެކު މިހާރުގެ ރައީސް މުއިއްޒުގެ މައްސަލަތައް ބަލާ ދުވަހަކުން އެ ކަމަށް މައާފު ދެއްވާނެ މީހެއް ނާންނާން ކަމަށާއި ސާބިތު ނުވާނެ ކަމަށް މުއިއްޒާއި ސަރުކާރުން ހީފުޅުނުކުރެއްވުމަށްވެސް އެމަނިކުފާނުގެ ވާހަކައިގައި ފާހަގަކުރެއްވިއެވެ. މިއީ ރައްޔިތުންނަށްވެސް މިހާރު އޮޅިވަޑައިގަންނަވާނެ ކަމެއް ނޫން ކަމަށާއި މުއިއްޒާއި މުއިއްޒުގެ ކައިރީގައި ތިއްބަވާ ބޭފުޅުންގެ މައްސަލަތައް ތަހުގީގު ކުރެވޭ ދުވަހަކުން އިބިލީސްވެސް ފިލާނެ ކަމަށް ބުނެ ރައީސް ޔާމީން ވަނީ ފާޑުވިދާޅުވެފައެވެ.
މި ސަރުކާރުން ދޭ މާފެއް އަޅުގަނޑު ބޭނުން ނުވާނެ. މުއިއްޒާއި މުއިއްޒު ކައިރީގައި ތިބި ބައިގަނޑުގެ މައްސަލަތައް ބަލާ ދުވަހަކުން އިބިލީސްވެސް ފިލާނެ
ރައީސް ޔާމީން ވިދާޅުވިއެވެ.
ޕީއެންއެފްގެ ޓައުން ހޯލް ޖަލްސާގައި ވާހަކަފުޅު ދައްކަވަމުން ރައީސް ޔާމީން އިތުރަށް ވިދާޅުވީ ޕާކިސްތާން ފަދަ ތަހުޒީބީ ގައުމުތަކުގެ ފަނޑިޔާރުން ގާނޫނު އަސާސީ ހިމާޔަތްކުރުމަށް މަގާމަކަށް ނުބަލައި މަސައްކަތް ކުރައްވާއިރު ރާއްޖޭގެ ފަނޑިޔާރުން މަސައްކަތް ކުރައްވަނީ ގާނޫނީ ނިޒާމު ފުނޑާލުމަށްކަމަށެވެ.
ޕާކިސްތާނުގެ ސްޕްރީމް ކޯޓުގެ އެންމެ ދުވަސްވީ އެއް ފަނޑިޔާރު މަންސޫރު އިސްތިއުފާ ދެއްވާ ނުކުމުވެޑައިގަތީ އެ ނިޒާމު ފުނޑާލިޔަ ނުދިނުމަށް ކަމަށާއި ނަމަވެސް ރާއްޖޭގެ ފަނޑިޔާރު އަހްމަދު މުއުތަސިމް މުޅި ނިޒާމު ފުނޑާލާފައިވާ ކަމަށް އެމަނިކުފާނު ފާހަގަކުރެއްވިއެވެ.
މުއުތަސިމް ފަދަ ފަނޑިޔާރުންނަށް މުހިއްމުވެގެންދަނީ އެހެނިހެން މަންފާތައް ކަމަށް ފާހަގަކުރައްވާ ރައީސް ޔާމީން ވިދާޅުވީ އެއް ދުވަސްވަރެއްގައި ހިނގާދިޔަ ކަންތައްތަކުން ޕާކިސްތާން ފަދަ ގައުމުތަކުގެ ފަނޑިޔާރުންނަށް މުހިއްމުވެގެން ދިޔައީ އެ ގައުމުގެ ގާނޫނު އަސާސީ ކަމަށެވެ.
