Gaumee Nau Dhany Manzileh Nethi Fethemun: Dr Jameel

ދިވެހިރާއްޖޭގެ ގައުމީ ނައު ދަނީ އެއްވެސް މަންޒިލެއް ނެތި ކުރަމުންދާ ދަތުރުގައި ފެތެމުން ކަމަށް ކުރީގެ ނައިބު ރައީސް އަދި ޕީއެންއެފްގެ ވެސް ނައިބު ރައީސް، ޑރ މުހައްމަދު ޖަމީލު އަހުމަދު ވިދާޅުވެއްޖެއެވެ.

އެކްސްގައި ކުރެއްވި ޕޯސްޓެއްގައި ޑރ ޖަމީލު ވަނީ، ފިނޭންސް މިނިސްޓްރީގެ ޑެޕިއުޓީ މިނިސްޓަރު އަހުމަދު ސާއިދު މުސްތަފާ ބަޖެޓު ދިރާސާ ކުރާ ކޮމިޓީގައި ގައުމުގެ މާލީ ހާލަތާ ގުޅުވާ ފާޅުކުރެއްވި ކަންބޮޑުވުންތަކަށް އިޝާރާތްކުރައްވާފައެވެ.

މިހާރު ކަނޑައެޅިފައިވާ މިންގަނޑުތަކަށް ވުރެ މައްޗަށް ގޮސްފި ހާލަތެއްގައި ސަރުކާރުގެ ހަރަދުތައް ނުހިފެހެއްޓޭނެ ކަމަށް ފިނޭންސުން ވަނީ، ބަޖެޓު ދިރާސާ ކުރާ ކޮމިޓީގައި ބުނެފައެވެ.

ސަރުކާރުން ބުނާ ގޮތުގައި މި އިތުރުވުން އައީ، މުވައްޒަފުން އިތުރު ވުމުންނައި ދައުލަތުގެ މުސާރަތައް އެއް ހަމަކުރަން ފަށާފައިވާ ޕޭ ހާމަނައިޒޭޝަންގެ ދަށުން މުސާރަތައް ބޮޑުކުރުން ހިމެނެއެވެ.

ނަމަވެސް، މިއީ ތާއަބަދަށް މި ގޮތަށް ދޫކޮށްލައިގެން ތިބެވޭނެ ކަމެއް ނޫން ކަމަށް ފިނޭންސުން ވަނީ މަޖިލީހުގައި ބުނެފަ އެވެ. މަޖިލީހުގެ ބަޖެޓު ދިރާސާކުރާ ކޮމިޓީއާ މި ކަންބޮޑުވުންތައް ހިއްސާކުރަމުން ފިނޭންސުގެ ޑެޕިއުޓީ މިނިސްޓަރު އަހުމަދު ސާއިދު މުސްތަފާ ވިދާޅުވީ ފިސްކަލް ޖާގަ އަހަރުން އަހަރަށް ކުޑަ ވަމުން އަންނަ ކަމަށެވެ.

ހަމައެހެންމެ މިހާރު އަންދާޒާކޮށް މުސާރައަށް ކުރާ ހޭދަ، މިހާރު ކަނޑައެޅިފައިވާ މިންގަނޑުތަކަށް ވުރެ މައްޗަށް ގޮސްފި ހާލަތެއްގައި ސަރުކާރުގެ ހަރަދުތައް ނުހިފެހެއްޓޭނެކަމަށްވެސް ވަނީ ވިދާޅުވެފައެވެ.

ސާއިދުގެ ވާހަކަތައް ހިއްސާކުރައްވާ ޑރ ޖަމީލު ވިދާޅުވެފައިވަނީ، ދުނިޔޭގެ މާލީ އިދާރާތައްކަމުގައިވާ އިންޓަނޭޝަނަލް މަނިޓަރީ ފަންޑު (އައިއެމްއެފް)އާ ވޯލްޑް ބޭންކު ފަދަ އިދާރާތަކުން ދިން ނަސޭހަތާ ލަފާ ރައީސް މުހައްމަދު މުއިއްޒު އަޑު ނާހާ އެކަންކަމަށް ބީރު ކަންފަތެއް ދިނުމުގެ ނަތީޖާ މިހާރު ފެންނަމުންދާ ކަމަށެވެ.

It’s now clear that @MMuizzu has failed to heed advice from @IMFNews and @WorldBank. He has squandered taxpayers’ money on political activists. As a nation, we are now facing a monumental financial crisis. He is rudderless — and the ship is drifting without a destination. https://t.co/WNIrAXWBLo
— Mohamed Jameel Ahmed (@MJameelAhmed) November 13, 2025

މީގެ އިތުރުން ގައުމުގެ ބައިތުލްު މާލުގައި ހުރި ރައްޔިތުންގެ ފައިސާ ރައީސް މުއިއްޒު ގެންދަވަނީ ސިޔާސީ މީހުންގެ މައްޗަށް ޚަރަދުކޮށް އިސްރާފުކުރައްވަމުން ކަން ފާހަގަކުރައްވާ ޑރ ޖަމީލު ވަނީ، މިއަދު ގައުމެއްގެ ހައިސިއްޔަތުން އަޅުގަޑުމެން ބައްދަލުކުރަމުން މިދަނީ ތާރީޚުގައިވެސް ލިޔެވޭނެ ފަދަ މާލީ ކާރިސާތަކަކާ ކަމަށެވެ.

ހަމައެހެންމެ ރައީސް މުއިއްޒަކީ އަމާޒެއް ނެތި ކުރިއަށް ވަޑައިގަންނަވާ ވެރިއެއްގެ ގޮތުގައި ސިފަކުރައްވާ ޑރޖަމީލު ޕޯސްޓު ނިންމަވާލައްވާފައިވަނީ، މަންޒިލެއް ނެތި ރާއްޖޭގެ ނައު ކުރަމުންދާ ދަތުރުގައި އެ އޮޑީދަނީ ފެތެމުން ކަމަށް ވިދާޅުވެފައެވެ.