ނިމިދިޔަ ސަރުކާރުގައި ހިނގި ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) ގެ މުވައްޒަފުން ހިމެނޭ ކޮރަޕްޝަންގެ މައްސަލައިގައި އެކެއްގެ އެކައުންޓަށް 11 މިލިއަން ރުފިޔާ އެކި ފަހަރު މަތިން ޖަމާވެފައިވާ ކަމަށް ފުލުހުން ބުނެފިއެވެ.

ފުލުހުން މިހެން ބުނެފައިވަނީ އިސްކަންދަރު ކޮށީގައި އެންޓީ ކޮރަޕްޝަން ކޮމިޝަން (އޭސީސީ) އާއެކުގައި ބޭއްވި ނޫސްވެރިންގެ ބައްދަލުވުމުގައެވެ.

ފުލުހުންގެ ފަރާތުން ވާހަކަދައްކަވަމުން ފުލުހުންގެ އެކްޓިން ހެޑް އޮފް ކްރައިމް އިންވެސްޓިގޭޝަން ކޮމާންޑް، ޗީފް ސުޕްރިންޓެންޑެންޓް އަހުމަދު ނާފިޒު ވިދާޅުވީ މި މައްސަލައިގައި ފާހަގަކުރެވޭ ތިން މީހަކު އުޅޭ ކަމަށް މިހާތަނަށް ތަހުގީގަށްށް އެނގިފައިވާ ކަމަށެވެ.

އަދި އިތުރު 15 ވަރަކަށް މުވައްޒަފުން މި މައްސަލައިގައި ހިމެނޭ ކަމަށް ލަފާކުރެވޭ ކަމަށް ވެސް އޭނާ ފާހަގަކުރެއްވިއެވެ.

މި ތިން މީހުންގެ ތެރެއިން އެކެއްގެ އަމިއްލަ އެކައުންޓަށް 11 މިލިއަން، އަނެއް މީހާގެ އެކައުންޓަށް ދެ މިލިއަން އަދި ތިންވަނަ މީހާގެ އަމިއްލަ އެކައުންޓަށް ތިން މިލިއަން ރުފިޔާ ޖަމާކޮށްފައިވާ ކަމަށްވެސް ނާފިޒް ވަނީ ވިދާޅުވެފައެވެ.

އަދި މި މައްސަލަ އެސީސީއަށް ވެސް ހުށަހަޅާފައިވުމާއެކު ފުލުހުންނާއި އޭސީސީ ގުޅިގެން ޖޮއިންޓް އިންވެސްޓިގޭޝަން ކުރިއަށް ގެންދިޔުމަށް އެމްއޯޔޫއެއްގައި ސޮއިކޮށްފައިވާ ކަމަށް ވެސް ނާފިޒް ވިދާޅުވިއެވެ.

ފުލުހުން ވަނީ ނޫސްވެރިންގެ ބައްދަލުވުމުގައި ދައުލަތުގެ ފައިސާ ބޭނުންކުރަންޖެހޭ އެންމެ އަސާސީ މިންގަނޑާ ހިލާފަށް އާރްޑީސީން ރޯލް ކޮށްފައި ހުރިކަމަށް ވެސް ފާހަގަކުރައްވާފައެވެ.

މިދިޔަ އަހަރު ނޮވެމްބަރު މަހުގައި (އާރްޑީސީ) ގެ އޮފީހުގައި ވަނީ އެތައް ގަޑި އިރުގެ ތަހްގީގް ކޮށް ގިނަ އަދަދެއްގެ ލިޔެކިޔުންތަކެއް ފުލުހުންގެ ބެލުމުގެ ދަށަށް ގެންގޮސްފައެވެ.

އާރުޑީސީގެ އެކައުންޓުގައި ހުރި 13.8 މިލިއަން ރުފިޔާ ވަގަށް ނަގައި އަމިއްލަ އެކައުންޓަށް ޖަމާކުރި މައްސަލައިގައި އެކުންފުނީގެ ކުރީގެ މެނޭޖިންގް ޑިރެކްޓާރ މޫސާ އަލީ މަނިކް (މޫކޭ) މައްޗައް ވަނީ ބައިވަރު ތުހުމަތުތަކެއް ކުރެވިފައެވެ.