ޒުވާނުން އިސްނަގައިގެން ރޭ ހުޅުމާލެ ފޭސް ދޭއްގައި ކުރިއަށް ގެންދިޔަ ޒުވާނުންގެ "ރައިޒްއަޕް" ހަރަކާތަށް ސަރުކާރުގެ އެއްވެސް ވަޞީލަތެއް ބޭނުންނުކޮށް، އެއްވެސް މަޖުބޫރުކަމެއްނެތި ހިތާއި ރޫހުން ވަޑައިގެންނެވި ކްރައުޑް ކުރިމަތީ ހާމަވި ރިޕޯޓަކީ ރައީސް މުއިއްޒަށް ލަދުވެތި ރިޕޯޓެއްކަމަށް ޕީއެންއެފްގެ ސެކްރަޓަރީ ޖެނެރަލް މުހައްމަދު މަލީހް ޖަމާލް ވިދާޅުވެއްޖެއެވެ.
މަލީހް އެކްސްގައި ކުރެއްވި ޕޯސްޓެއްގައި ވިދާޅުވީ މުއިއްޒުގެ ދެ އަހަރުވީ ސަރުކާރަށް ރައްޔިތުން ދިން ރިޕޯޓް ކާޑް ރޭ އިވެންޓުން ހާމަވެގެން ގޮސްފައިވާ ކަމަށެވެ.
ރައީސް އަބްދުﷲ ޔާމީން އަބްދުލްގައްޔޫމް ވަރަށް ދީލަތިކޮށް މާރކްސް ދެއްވައިގެންވެސް މުއިއްޒަށް ލިބިވަޑައިގަތީ 100 އިން 20 މާރކްސް ކަމަށް ވިދާޅުވެ މަލީހް ވަނީ ބޮޑެތި ފާޑުކިޔުންތައް އަމާޒުކޮށްފައެވެ.
ރޭގެ އިވެންޓަށް މީހުން ދިޔުމަށް ދަތިކުރުމުގެ ގޮތުން ސަރުކާރުން ވަނީ ފޭސް ދޭއްގެ ފްލެޓްތަކުގައި ފެނުގެ ޚިދުމަތް ކަނޑާލާ، ލިފްޓްތަކުގައިވެސް މައްސަލަތަކެއް ކުރިމަތިކޮށްފައިކަމަށް ގިނަ ބަޔަކު ތުހުމަތުކުރެއެވެ.
ނަމަވެސް، މި ހުރަސްތަކަކާއި އެކުވެސް ރައީސް ޔާމީނަށް އޮތް ތާއީދާއި ލޯބި ހާމަކުރުމަށް ގިނަ އަދަދެއްގެ ބަޔަކު ވަނީ މި އިވެންޓްގައި ބައިވެރިވެ ޒުވާނުންގެ ހަގީގީ ރައީސް ދައްކާފައެވެ.
ދިވެހި ރައްޔިތުންނަށް މިހާރު ކުރިމަތިވެފައިވާ މައްސަލަތައް ހައްލު ހޯއްދަވައިދެއްވުމަށް ރައީސް ޔާމީން އަންނަނީ ވަރަށް ބޮޑަށް ވަކާލާތުކުރައްވަމުންނެވެ. އެމަނިކުފާނުގެ ޕާޓީއިން ބާއްވަމުން އަންނަ ޖަލްސާތަކުންވެސް މިކަން ހާމަވެގެންދާއިރު މި ޖަލްސާތަކަށް ގިނަ ބަޔެއްގެ ތަރުހީބު އަންނަނީ ލިބެމުންނެވެ.
