ރައީސް ކަމުގެ މަގާމު އަދާކުރެއްވުމަށް ފަހު ވަކިވެވަޑައިގެންނެވި ފަހުން ފާއިތުވެގެން ގޮސްފައިވާ 7 އަހަރުގެ ތެރޭގައި އޮފީސް ހިންގަން ނެގި ބައި ލޯ ލާރިއެއްވެސް، އަދި އަމިއްލަފުޅަށާ އާއިލާގެ ބޭސްފަރުވާއަށް ފޮނުވި ބިލެއްވެސް ނޯންނާނެ ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ، ކުރީގެ ރައީސުންގެ އޮފީސް ހިންގަން ދައުލަތުން މަހަކު 175،000ރ ދިނުން ހުއްޓާލުމާއި އެ ބޭފުޅުންގެ އިނާޔަތްތައް ކުޑަކުރުމާއި އެ ނޫން ވެސް ބައެއް ބަދަލުތައް ގާނޫނަށް ގެންނަން ސަރުކަރުން ހުށަހެޅި ބިލުގެ ބަހުސްގައި ޕީއެންސީގެ ޕީޖީ ލީޑަރު އިބްރާހިމު ފަލާހު ރައީސް ޔާމީނަށް ނިސްބަތްކޮށް އެތައް ވާހަކައެއް ދެއްކުމުން އެކަމަށް ރައްދު ދެއްވާއެވެ.

ސަރުކާރުގެ ފަރާތުން ހުޅުދޫ ދާއިރާގެ ޕީއެންސީ މެންބަރު މުހައްމަދު ޝާހިދު ހުށަހެޅުއްވި އެ ބިލަށް މަޖިލީހުގެ ޖަލްސާގައި ކުރި ބަހުސްގައި ފަލާހު ވިދާޅުވީ، ރައީސްކަން ކުރައްވާފައިވާ ބޭފުުޅުންނަށް ހިމާޔަތާއި ރައްކާތެރިކަން ދޭން ޖެހޭނެ ކަމަށާއި އެއީ ގައުމަށް ވަރަށް ބޮޑު ހިދުމަތެއް ކުރައްވާފައިވާ ބޭފުޅުން ކަމަށެވެ. ނަމަވެސް އޭނާ ތުހުމަތު ކުރެއްވީ ބައެއް ރައީސުން ވެރިކަން ކުރެއްވި އިރު ދައުލަތުގެ ހަޒާނާ އިން ވަރަށް ގިނަ އަދަދެއްގެ "ފައިސާ ނަންގަވައިގެން" ވަރަށް ބޮޑެތި ގެތައް އަޅުއްވާފައި އެބަހުރި ކަމަށެވެ.

އޭނާ ތުހުމަތު ކުރެއްވި ގޮތުގައި ރައީސް ޔާމީންގެ ގެކޮޅުގައި "ސިޔާސީ" މަސައްކަތްތައް ކުރައްވާ ނަމަ އެ ކަން އެމަނިކުފާނު ކުރައްވަނީ ދައުލަތުން "ފައިސާ ލިބިގެން"ނެވެ. އަދި އެއީ "ނުހައްގު" ފައިސާގެ އިމާރާތެއް ކަމުގެ ތުހުމަތު ވެސް ރައީސް ޔާމީންގެ އިސްތަށިފުޅުގައި ފަލާހު އެޅުވިއެވެ.

ފަލާހު ވިދާޅުވީ ރާއްޖޭގައި ތިއްބެވީ ކުރީގެ ފަސް ރައީސުން ކަމަށް ވުމުން ވަކި ބޭފުޅެއްގެ ނަން އޭނާގެ ވާހަކައިގައި ނުގެނައި ނަމަވެސް އެއީ ކޮން ބޭފުޅެއްކަން "މި ވަރަށް ދެންނެވީމާ އެނގޭނެ" ކަަމަށެވެ.

މިވާހަކަތަކަށް ރައްދު ދެއްވަމުން ރައީސް ޔާމީން ވިދާޅުވީ، އެފަދަ ވާހަކަތަކުން "ސޯޓު ބޭލޭނީ ހަމަ އެ ބޭފުޅުން"ގެ ކަމަށާއި އެމަނިކުފާނު ވެރިކަން ނިމުނުތާ ހަތް އަހަރު ވީއިރު، މިހާތަނަށް އޮފީސް އިނާޔަތް ވެސް ނަންގަވާފައިނުވާނެ ކަމަށެވެ.

އެމަނިކުފާނު އިތުރަށް ވިދާޅުވި، ކުރީގެ ރައީސުންނަށް ދޭ އިނާޔަތްތައް ގާނޫނުގައި ހިމަނާފައި އޮތަސް، އެއީ ހުރިހާ ރައީސުން ނަންގަވާ އެއްޗެއް ނޫން ކަމަށެވެ. އެގޮތުން ހަމަގައިމުވެސް އެމަނިކުފާނަކީ އެ އިނާޔަތް ނަގްނަވާ ރައީސެއް ނޫން ކަމަށެވެ.

އެހެންކަމުން އެމަނިކުފާނަށް އަމާޒުކޮށް، އެފަދަ ވާހަކަތައް ދައްކައި، ގާނޫނުތައް އިސްލާހުކުރިޔަސް، އެއިން ގެއްލުންވާނީ ޕީއެންސީގެ ފަރާތުން ވެރިކަމުގައި ހުންނެވި ރައީސް މުހައްމަދު މުއިއްޒަށް ކަން ޕީއެންސީ މެންބަރުންނަށް އެނގެންވާނެ ކަމަށް ވިދާޅުވިއެވެ.

މަޖިލީހަށް ސަރުކާރުން ހުށަހަޅާފައި ވަނީ އޮފީސް ހިންގުމަށް ކުރީގެ ރައީސުންނަށް ފައިސާ ނުދޭގޮތަށް ހެދުމުގެ އިތުރުން ނައިބު ރައީސްކަން ކުރައްވާފައިވާ ބޭފުޅުންނަށް 25،000 ރުފިޔާގެ އިނާޔާތެއް ދިނުމަށެވެ.