ރާއްޖޭގެ ރަށްރަށުގެ ތަރައްޤީއާއި ރައްޔިތުންނަށް ދިމާވާ ކަންކަމުގައި އަޑުއެހުމަށް ގާއިމުކޮށްފައިވާ އަތޮޅު ކައުންސިލްތައް އުވާލުމަށް ސަރުކާރުން ނިންމާފައިވާ ނިންމުމަކީ، ގައުމުގެ ހުރިހާ ބާރެއް މަރުކަޒީކޮށް، ސީދާ ރައީސްގެ އަތްދަށަށް ގެނައުމުގެ މަސައްކަތެއް ކަމަށް ގިނަ ބަޔަކު ދަނީ ތުހުމަތު ކުރަމުންނެވެ. މި ނިންމުމަކީ ރައްޔިތުންގެ މެދުގައި ބޮޑު ހިތްހަމަނުޖެހުންތަކާއި ކަންބޮޑުވުމެއް އުފެދިގެން ދިޔަ ނިންމުމެއްކަން ޔަގީނެވެ.

ސަރުކާރުން ވަނީ އަތޮޅު ކައުންސިލްތައް އުވާލައި، އެ ކައުންސިލްތަކުން ކުރަމުންދިޔަ މަސައްކަތްތައް ސަރުކާރުގެ ވަކި އޮނިގަނޑެއްގެ ދަށުން ހިންގުމަށް ނިންމާފައެވެ. މި ނިންމުން ރަސްމީކޮށް އިއުލާން ކޮށްފައިވަނީ ކުއްލި ގޮތަކަށެވެ. މިއީ ރައްޔިތުންގެ ބައިވެރިވުން ކުޑަކޮށް، މަރުކަޒީ ސަރުކާރުގެ ނުފޫޒު ފުޅާކުރުމަށް ކުރެވޭ ކަމެއް ކަމަށް ސިޔާސީ މުރާސިލުން ދެކެއެވެ.

މި ނިންމުމަށް ރާއްޖޭގެ އެކި ކަންކޮޅުތަކުން އަންނަނީ ވަރަށް ބޮޑަށް ފާޑުކިޔުންތައް އަމާޒުކުރަމުންނެވެ. ގިނަ ރައްޔިތުން ދަނީ، އަތޮޅު ކައުންސިލްތައް އުވާލުމަކީ ރައްޔިތުންގެ ބަސް ނެތިކޮށްލުމަށް ކުރެވޭ ކަމެއް ކަމަށާއި، ރައްޔިތުންނާ ގާތުން ދިމާވާ މައްސަލަތަކަށް ހައްލު ހޯދުމަށް ދަތިތަކެއް ކުރިމަތިވާނެ ކަމަށް ބުނެ އަޑުއުފުލަމުންނެވެ. މިގޮތުން ބޮޑެތި ސިޓީތަކުގައި އާއި އެކި ރަށްރަށުގައި ރައްޔިތުން އިހުތިޖާޖު ކުރަމުން އަންނައިރު މީސް މީޑިއާގައި ވެސް މިކަމާ ގުޅޭގޮތުން ހޫނު ބަހުސްތަކެއް ދަނީ ކުރެވެމުންނެވެ.

ކުރިން ރާއްޖޭގައި އަތޮޅު ކައުންސިލްތައް ގާއިމުވެފައި ނެތް ދުވަސްވަރު އަތޮޅުތަކުގެ ކަންތައްތައް ހިންގީ އަތޮޅުވެރިންނާއި، ރަށުވެރިންގެ ބާރުގެ ދަށުންނެވެ. އެ ދުވަސްވަރުވެސް މައި ސަރުކާރުގެ ނުފޫޒު އޮތް ނަމަވެސް، ލާމަރުކަޒީ ނިޒާމެއް ގާއިމުކުރުމުގެ މަޤްސަދުގައި 2010 ވަނަ އަހަރު ލާމަރުކަޒީ ގާނޫނު ތަސްދީގުކޮށް، އަތޮޅު ކައުންސިލްތަކާއި ރަށު ކައުންސިލްތައް އުފެއްދިފައި ވަނީ، ރައްޔިތުންނަށް އިދާރީ ހިންގުމުގައި ބައިވެރިވުމުގެ ފުރުސަތު ދިނުމަށެވެ. އެގޮތުން، ކައުންސިލްތަކުން ވަނީ އެބައިމީހުންގެ ސަރަހައްދުތަކުގައި ގިނަގުނަ ތަރައްޤީގެ މަސައްކަތްތަކެއް ކޮށް، ރައްޔިތުންނަށް ގާތުން ޚިދުމަތްތައް ފޯރުކޮށްދީފައެވެ.

އަތޮޅު ކައުންސިލްތަކަކީ އެއަތޮޅު ރައްޔިތުންގެ ދިރިއުޅުމާ ގުޅިފައިވާ މުހިއްމު ކަންތައްތަކުގައި ސީދާ ބައިވެރިވެ، ނިންމުންތައް ނިންމުމުގެ ބާރު ލިބިގެންވާ އިދާރާތަކެކެވެ. އެކައުންސިލްތަކުން ތަރައްޤީގެ މަޝްރޫޢުތައް ރާވައި ހިންގުމާއި، ރައްޔިތުންނަށް ދިމާވާ މައްސަލަތަކަށް ހައްލު ހޯދުމުގައި މުހިއްމު ދައުރެއް އަދާކުރެއެވެ. މިސާލަކަށް ބަލާއިރު ރަށްރަށުގެ ފެނާއި ނަރުދަމާ ނިޒާމު، ކުނި މެނޭޖްކުރުން، ސިއްހީ ޚިދުމަތްތަކާއި ތައުލީމީ ކަންތައްތައް ހަރުދަނާ ކުރުން ފަދަ ކަންކަމުގައި ކައުންސިލްތަކުގެ މުހިއްމު ރޯލެއް އޮވެއެވެ. މިކަންތައްތައް މަރުކަޒީކޮށްފިނަމަ، ރަށްރަށުގެ ދުރުރާސްތާ ބޭނުންތަކަށް ރަނގަޅަށް އިޖާބަ ދިނުމަށް ދަތިތަކެއް ކުރިމަތިވެދާނެއެވެ.

މިހާރުވެސް ބޮއްސުންލާފައިވާ ސަރުކާރަކަށް، މިފަދައިން ހުރިހާ ބާރެއް މަރުކަޒީ ކުރުމުން ދިވެހިރާއްޖެއޭ ކިޔާ ގައުމެއް އިތުރަށް އޮންނާނެ ކަމާއި މެދު ޝައްކު އުފެދެއެވެ. ގައުމުގެ އިގްތިސާދީ ހާލަތު ދަށްވެ ރައްޔިތުން އިންތިހާއަށް ނިކަމެތިވެފައިވާ މި ދަނޑިވަޅުގައި ގައުމުގެ ވެރިމީހާ މަސައްކަތް ކުރަނީ އަޅުން ގެންގުޅުނު ޒަމާނާއި އެއްގޮތަށް ހުރިހާ ބާރެއް މުއިއްޒުގެ މުށުތެރެއަށް ލައި ރައްޔިތުން ގަނަތަޅުވަންކަން ގަައިމެވެ.

ފާޑުކިޔާ ފަރާތްތަކުން ބުނާގޮތުގައި، ސަރުކާރުން މިކަންތައްތަކަށް އެއްވެސް ވަރަކަށް ވިސްނާނުލައި، ރައްޔިތުންގެ ބަހެއް ނެތި މިފަދަ ބޮޑު ނިންމުމެއް ނިންމާފައި ވާތީ، މިއީ ގައުމީ މަސްލަހަތަށް ގެއްލުންހުރި ކަމެކެވެ. ރައީސް މުއިއްޒުގެ މި ސަރުކާރުން ވެރިކަމަށް އައީ ލާމަރުކަޒީ ނިޒާމު ހަރުދަނާކޮށް، ރައްޔިތުންނަށް ބާރުވެރިކަން ދިނުމުގެ ވައުދާ އެކު ކަމަށް ވާއިރު، މި ނިންމުމަކީ އެ ވައުދާ ކަނޑައެޅިގެން ޚިލާފު ކަމެއް ކަމަށް ގިނަ ބަޔަކު ދަނީ ބުނަމުންނެވެ. މިކަމުގެ ސަބަބުން ރައްޔިތުންނާއި ސަރުކާރުގެ ދެމެދުގައި އޮންނަ އިތުބާރުގެ ގުޅުމަށް ބުރޫއެރުމުގެ ފުރުސަތު ބޮޑުކަމަށްވެސް މުޙައްލިލުން ދެކެއެވެ.

ނަމަވެސް، ރައްޔިތުންގެ އިތުބާރާއި ތާއީދަށްވުރެ މުއިއްޒަށް މުހިންމީ އާރާއި ބާރުކަން މުއިއްޒު ވަނީ ރައްޔިތުންނަށް އެތަކެއް ފަހަރުމަތިން ސާބިތުކޮށްދީފައެވެ.