ސަރަހައްދީ އަދި ބައިނަލްއަގްވާމީ ސިޔާސީ މައިދާނަށް ބޮޑު ސަމާލުކަމެއް ދަމައިގަންނަ ކަމެއްގެ ގޮތުގައި، އިރާނުން އޭގެ ފުރަތަމަ ނިއުކްލިއަރ މިސައިލް މި މަހު ތަޖުރިބާކުރުމަށް ތައްޔާރުވަމުންދާ ކަމުގެ ޚަބަރުތައް ވަނީ ފެތުރިފައެވެ. މިކަމުގެ ސަބަބުން އިރާނުގެ ދިފާޢީ ގާބިލުކަން އިތުރުވެގެންދާނެ ކަމަށް ބެލެވޭއިރު، މިއީ މެދުއިރުމަތީގެ ހަމަޖެހުމަށްވެސް އަސަރު ފޯރުވާނެ ކަމެއްގެ ގޮތުގައި ގިނަ ބަޔަކު ދެކެއެވެ.
މި ތަޖުރިބާއަކީ އިރާނުގެ މިސައިލް ޕްރޮގްރާމަށް ލިބޭ ބޮޑު ކުރިއެރުމެއް ކަމަށް ބެލެވެއެވެ. އިރާނުގެ މަސްއޫލުވެރިން މިކަމާ ގުޅޭގޮތުން ރަސްމީ ބަހެއް އަދި ނުދެއްވި ނަމަވެސް، ޑިފެންސް އަދި އިންޓެލިޖެންސް ރިޕޯޓްތަކުން ދައްކާ ގޮތުގައި، މި މިސައިލް ތަޖުރިބާކުރުމަށްޓަކައި ބޮޑެތި ތައްޔާރީތަކެއް ދަނީ ކުރެވެމުންނެވެ. މިކަމުގެ މަގުސަދަކީ އިރާނުގެ ދިފާޢީ ގާބިލުކަން އިތުރުކުރުމަށް ކަމަށް ތަޖުރިބާކާރުން ބުނެއެވެ.
އިރާންއިން ނިއުކްލިއަރ މިސައިލް ޓެސްޓް ކުރުމަށް ތައްޔާރުވަމުން އަންނައިރު ޚާއްސަކޮށް، ހުޅަނގުގެ ބާރުތަކުންނާއި، ޔަހޫދިން މިކަމަށް ވަރަށް ބޮޑަށް ސަމާލުކަން ދޭނެކަމަށް ލަފާކުރެވެއެވެ.
މިކަމާ ގުޅިގެން އެމެރިކާއާއި ހުޅަނގުގެ އެހެން ބާރުތަކުން އިރާނަށް ދީފައިވާ އިންޒާރުތަކާއި، އަޅާފައިވާ ދަތިކުރުމުގެ ފިޔަވަޅުތަކަށް އިރާނުން ބިރުގަތުމެއް ނެތި ކުރިއަށްދާކަން މިކަމުން ހާމަވެއެވެ. އިރާނުން ބުނަނީ އެމީހުންގެ ދިފާޢީ ގާބިލުކަން ވަރުގަދަކުރުމުގެ ހައްޤު އެމީހުންނަށް ލިބިފައިވާ ކަމަށާއި، ބޭރުގެ އެއްވެސް ބާރަކަށް އެކަން ހުއްޓުވުމުގެ ބާރެއް ނޯންނާނެ ކަމަށެވެ. މިއީ އެމެރިކާގެ ސިޔާސަތުތަކަށް ދެމުންދާ ސީދާ ގޮންޖެހުމެއްގެ ގޮތުގައި ގިނަ ބަޔަކު ދެކެއެވެ.
މި ތަޖުރިބާ ކާމިޔާބުވެއްޖެނަމަ، އިރާން ނިއުކްލިއަރ މިސައިލް ހަދާ ގައުމުތަކުގެ ތެރެއަށް ވަންނާނެއެވެ. އިރާނުގެ މި މިސައިލް ޕްރޮގްރާމް ކުރިއެރުވުމުގެ ސަބަބުން، ސަރަހައްދީ އަސްކަރީ ގާބިލުކަން އިތުރުކުރަން އެހެން ގައުމުތަކުންވެސް މަސައްކަތްކުރާނެ ކަމަށް ލަފާކުރެވެއެވެ.
