އިންތިހާބުތަކާ ދިމާކޮށް އުކާ އެމަށް ވައުދުތައް ނުހެދުމަށް ދިވެހި މަސްވެރިން، ރައީސް ޑރ މުހައްމަދު މުއިއްޒަށް ގޮވާލާއިފިއެވެ.
ޕީއެންއެފްގެ ޓައުން ހޯލު ޖަލްސާގައި ބުރާސްފަތި ދުވަހުގެ ރޭ ބައިވެރިވެ ބޮޑު ކަންނެލި މަސްވެރިންގެ ޔޫނިއަންގެ މަސްވެރިން ވަނީ އެމީހުންގެ ޝުއޫރު ފާޅުކޮށްފައެވެ.
އެގޮތުން ބޮޑުކަންނެލި އޮޑިއެއްގެ ކެޔޮޅެއް ކަމުގައިވާ ހަސަން އިނާޔަތު ވަނީ ސަރުކާރުން ވީވައުދު ނުފުއްދާތީ މަސްވެރިން ކުރަމުންދިޔަ އިހުތިޖާޖުގެ ތެެރެއިން މަސްވެރިންގެ އޮޑިތަކަށް އަރާ ފުލުހުން ވަނީ ރައީސް މުއިއްޒާ ހޯމު މިނިސްޓަރުގެ އަމުރަށް އެ މަސްވެރިންނަށާ އަދި އޮޑިތަކުގައި ގަވާއިދާ އެއްގޮތަށް ގެންގުޅެމުން ދިޔަ ބިދޭސީންނަށްވެސް އަނިޔާކޮށް ހައްޔަރަށް ގެންގޮސްފައި ކަމަށެވެ. އެހެންކަމުން މަހަށް ފުރޭނެ ގޮތްވެސް ހުސްވެފައި ތިބި ކަމަށާ ނަމަވެސް އިހުތިޖާޖު ހުއްޓާލުމެއް ނެތް ކަމަށް ވެސް އިނާޔާތު ވަނީ ބުނެފައެވެ.
އިނާޔަތު އިތުރަށް ބުނެފައިވަނީ، ރައީސް މުއިއްޒު ގެންދަވަނީ ވައުދާ ޚިލާފުވަމުން ކަމަށާ އެހެންކަމުން ވައުދުތައް ނުފުއްދޭނަމަ ރައީސް ކަމުން މުއިއްޒު އިސްތިއުފާދިނުމަށް ވެސް އިނާޔަތު ގޮވާލާފައިވެއެވެ.
އިނާޔަތު ވަނީ ވައުދަކީ ކޮންމެ އިންތިހާބަކާ ދިމާކޮށް އުކާ އެމަށް ނުހެދުމަށްވެސް ރައީސް މުއިއްޒަށް ގޮވާލާފައެވެ.
މަސްވެރިންނާ ނުކުމެ އިހުތިޖާޖު ކުރަން ފަށާފައިވަނީ ވައުދު ނުފުއްދަންޏާ މަހަަކަށް ނުފުރޭނެކަމަށް ބުނަމުންނެވެ. އެ އިހުތިޖާޖުގައި މަސްވެރިންގެ 3 ޑިމާންޑެއް ކޮށްފައިވެއެވެ. އެގޮތުން ސަރުކާރުގެ މަސް ކުންފުނި، މިފްކޯއަށް ބޮޑު ކަންނެލި ގަންނަން ފެށުމަށާއި ކަންނެލި ގަނެވޭނެ އެންމެ ދަށް އަގަކީ 80ރ. އާއި 100ރ. އާ ދެމެދު ކަމަށް ކަނޑައެޅުމުގެ އިތުރުން ބޭސް ރޭޓުގައި މަސްވެރިންނަށް ތެލާއި އައިސް ލިބޭނެ ގޮތް ހަދައިދިނުމަށް އިހުތިޖާޖުގައި މަސްވެރިން އަންނަނީ ގޮވަމުންނެވެ.
