ސަރުކާރުގެ އޮފީސްތަކުގައި މަސައްކަތްކުރާ އަންހެން މުވައްޒަފުން ރަސްމީ މަސައްކަތަށް ނުކުންނައިރު ހެދުން އަޅަންޖެހޭ ގޮތަށް ބަދަލު ގެނެސް، ހެދުމުގެ ދިގުމިން ފަލަމަސްގަނޑާ ހަމައަށް ހުރުން ލާޒިމްކޮށް ސިވިލް ސާވިސްގެ ގަވާއިދު އިސްލާހުކޮށްފިއެވެ.
ދިވެހި ސިވިލް ސާވިސްގެ ގަވާއިދު 2014 އަށް ގެނައި މި ބަދަލުގައި، ފިރިހެން މުވައްޒަފުންނާއި އަންހެން މުވައްޒަފުން ރަސްމީ ގަޑީގައި ހެދުން އަޅަންޖެހޭ ގޮތްތައް ވަނީ ވަކިވަކިން ވަރަށް ތަފްސީލުކޮށް ފާހަގަކޮށްފައެވެ. މި ބަދަލުގައި އަންހެން މުވައްޒަފުން ލާ ހެދުމުގެ ދިގުމިން ފަލަމަސްގަނޑާ ހަމައަށް ހުންނަންވާނެ ކަމަށް ކަނޑައަޅާފައިވެއެވެ.
މީގެ ކުރިން އަމަލުކުރަމުންދިޔަ ގަވާއިދުގައި އަންހެން މުވައްޒަފުންގެ ހެދުމުގެ ދިގުމިނާ ގުޅޭގޮތުން މިފަދަ ހަރުކަށި މިންގަނޑެއް ކަނޑައަޅާފައެއް ނުވެއެވެ. ކުރިން އޮންނަ ގޮތުން މުވައްޒަފުން ތިބެންޖެހެނީ ރާއްޖޭގެ މުޖުތަމައު ގަބޫލުކުރާ މިންގަނޑުތަކުގެ ތެރެއިން، ތަހުޒީބު އަދި ދީނާއި ޚިލާފުނުވާ ފަދަ ހެދުމެއްގައެވެ. ނަމަވެސް، އަލަށް ގެނައި އިސްލާހާއެކު، ސިވިލް ސާވިސްގައި މަސައްކަތްކުރާ ހުރިހާ އަންހެން މުވައްޒަފުންވެސް މި އައު އުސޫލަށް އަމަލުކުރުން މިހާރު ވަނީ މަޖުބޫރުވެފައެވެ.
ސިވިލް ސާވިސް ކޮމިޝަނުން މިފަދަ ބަދަލެއް މި ގެނައީ، ސަރުކާރުގެ އޮފީސްތަކުގައި މަސައްކަތްކުރާ މުވައްޒަފުން ހެދުން އެޅުމުގެ މިންގަނޑުތައް އިޖުތިމާއީ ގޮތުން ބަަލައިގަންނަ މިންގަނޑަށް ވުރެ ދަށްވެފައިވާ ކަމުގެ ޝަކުވާތައް ލިބެމުންދާތީ އެކަން ބަދަލުކުރަން ކަމަށް އެ އިދާރާއިން ބުނެއެވެ.
އަންހެން މުވައްޒަފުންގެ ހެދުން އެޅުމުގައި އަލަށް ހިމެނި ކަންކަން:
މި އިސްލާހަށް އަމަލުކުރަން ފެށުމާއެކު، ސަރުކާރުގެ ހުރިހާ އިދާރާތަކެއްގައި މަސައްކަތްކުރާ ސިވިލް ސާވިސް މުވައްޒަފުން މި މިންގަނޑަށް ފެތޭގޮތަށް ހެދުން ބެހެއްޓުމަށް ސިވިލް ސާވިސް ކޮމިޝަނުން ވަނީ އަންގާފައެވެ.
