ހަމަހަމަކަމާއި، ތަފާތުނުކުރުމާއި، އަދި ފަރުދީ މިނިވަންކަން ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީއިން ކޮންމެ ރައްޔިތަކަށްމެ ކަށަވަރުކޮށްދެއެވެ.
އެހެންނަމަވެސް ދައުލަތުގެ މުއައްސަސާތަކަކީ މުވައްޒަފުންގެ ހައްގުތައް ހިމާޔަތްކުރަންޖެހޭ ތަންތަންކަމުގައިވާއިރު މިއަދު ފެންނަމުންދަނީ، އަންހެނުންގެ "އެޕިއަރެންސް" މޮނިޓާ ކުރުމަށް ބާރުގެ ބޭނުންކޮށްގެން ސަރުކާރުން ބަދަލުތައް ގެންނަން މަސައްކަތް ކުރާ މަންޒަރެވެ.
މަސައްކަތުގެ ފެންވަރު ވަޒަންކުރަނީ މީހަކު ލާ ހެދުމަކުން ނުވަތަ އަޅާ ބުރުގައެއް ކުލަކުން ނުވަތަ ހެނ=ދުމުގެ ކުރު ދިގުމިނަކުން ނޫންކަމަށް ގިނަ ބަޔަކު އިއްތިފާގުވާއިރު ހެދުން އެޅުމުގެ މިންގަޑެއް ކަނޑައެޅުމުން އެކަމާ ދެކޮޅަށް ބަސްބުނުމަކީ ލާދީނީ ކަމެއްގެ ގޮތުގައި ސަރުކާރުގެ ބޮޓުން ސިފަކުރި ނަމަވެސް އަންހެން މުވައްޒަފުން ބުނަނީ ފަރުވާލެއް ނެތް ކަމަށެވެ. އެހެނީ އެއީ އެމީހުންގެ ފަރުދީ މިނިވަން ކަމަށް ހުރަސް އެޅުން ކަމުގައި އެ މުވައްޒަފުން ދެކެއެވެ.
ހަމައެހެންމެ ކުރިން ދެންނެވުނު ފަދައިން ދިވެހި ގާނޫނު އަސާސީގައި އެއްވެސް ރައްޔިތަކު ތަފާޓުނުކުރަން އޮންނަ އުސޫލުގެ ތެރެއިން ސަރުކާރުގެ ޕޭހާމނައިޒޭޝަންގެ ތެރޭގައި ތިބި ބައެއްގެ މެދުގައި ހެދުން އެޅުމުގެ މިންގަޑެއް ކަނޑައަޅާ ފަރަގުކުރުންތަކެއް ގެންގުޅުމުގެ ހައްގު ވަލިޔުއްލްއަމުރަށްވެސް ނޯވެއެވެ.
އެހެންކަމުން ސިޔާސީ މަގާމުތަކުގައި ތިއްބަވާ އިސް ކަނބަލުންނާއި، މިނިވަން މުއައްސަސާތަކުގައި ތިއްބަވާ އިއްޒތްތެރި ލޫޅާފަތި ކަމަނާމެންނާ، އަދި ސަރުކާރުގެ ކުންފުނިތަކުގެ އެމްޑީއިން ފެށިގެން ގޮސް ތިއްބަވާ ރީތި ހުސްކުރި އަންހެން މުވައްޒަފުންނަށް މި ފަދަ އުސޫލެއް ނުހިންގައި، ހަމަ އެކަނި ސިވިލް ސަރވިސްއަށް ނިސްބަތްވާ އަންހެން މުވައްޒަފުންގެ މައްޗަށް މި ފަދަ އުސޫލެއް ތަންފީޒުކުރުމުން، މިއީ މުވައްޒަފުންގެ އަހްލާގާ ގުޅޭ އުސޫލެއް ނޫންކަމާއި، ރަސްމީކޮށް ތަފާތުކުރުމުގެ ސިޔާސަތެއްކަމަށް ކަނޑައެޅުމުގެ ފުރުސަތު ބޮޑުތަނުން ހާމަކޮށް ބޮޑުކޮށް ލިބިގެންދެއެވެ.
އަހްލާގު ނެގެހެއްޓުމުގެ ޒިންމާ އަންހެނުންގެ ބޮލުގައި އަޅުވައި، މުޖުތަމައުގެ އަހްލާގީ މިންގަނޑު ހިފެހެއްޓުމަކީ ހަމައެކަނި އަންހެނުންގެ ހެދުން އެޅުމާ ގުޅިފައިވާ ކަމެއްގެ ގޮތުގައި ދައްކާ އަންހެނުންނަށް ބޮޑުތަނުން އިހާނެތިވެ، އަންހެނުންގެ ކަރާމާތް އިސްކުރަން އެންމެ ބޮޑަށް ދީނަށް ތަބާވެ ތިބި އެދީން ހަތިޔާރެއްގެ ގޮތުގައިވެސް ނަގާ "މުއިއްޖު" ސަރުކާރުން އިސްތަށިގަނޑުގައި ފާޅުކަން ބޮޑު ކުލައެއް ޖައްސައި ޝޭޑުކޮށް ހައިލައިޓްކުރުން ވެސް މަނާކޮށްފައިވަނީ ދައުލަތުގެ މުސާރައިގައި ތިބި އަންހެނުންގެ ތެރޭގައި ތފާތުކުރުމަށް މަގު ފަހިކުރަމުންނެވެ.
އިސްލާހުވާން އެދޭ ނަމަ ފުރަތަމަ ތިމާ އެއަށް ފަހު ތިމާގެ ކައިރީގައި ތިބޭ މީހުން އިސްލާހުވުމަށް ފަހު އެހެން މީހުންނަށް އެ އަމުރު މައުރޫފު ހިންގުން ކިހިނެއްވާނެބާއެވެ؟ ބޮލުގައި ޖައްސަންވީ ކުލައާ ލާ ހެދުމުގެ ކުރު ދިގުމިނާ ހެދުމުގެ ބާރުމިނާ ޖަހަންވީ ސެންޓަކާ ދުއްވަންވީ ސައިކަލްގެ ބްރޭންޑާ އަރަންވީ ފައިވާނުގެ އުސްމިނާ މިހެން ގޮސް ޒާތީ ކަންކަމަށް ސަރުކާރުން ނުފޫޒޫ ފޯރުވުމަކި ހިތުން މާ ސަޅިކަމެއް ނަމަވެސް އެއީ ގައްޑާކަން ދައްކަން ބޭނުންކުރާ ޚުދުމުހުތާރު ސިފައެކެވެ.
ފަރުދީ މިނިވަންކަމަށް އަރައިގަނެ ބޮލުގައި ޖައްސަންވީ ކުލަ އެނގޭނީ "މުއިއްޖު" އަކަށް ނޫނެވެ. އެއީ އަމިއްލަ މިނިވަންކަމެވެ. އެހެނީ އެ ކުލަ އެޖައްސަނީ ވެސް އެ މުވައްޒަފަކު ބުރަ މަސައްކަތްކޮށްގެން ހޯދާ ފައިސާއިން ކަމަށްވުމުންނެވެ. "މުއިއްޖު"އާ "މުއިއްޖު"ގެ އައުވާނުންހެން ބޮޑެތި ގޮނޑިތަކަށް އަރާ ތިބެ ސިޔާސީ ކުޅިބައި ރާވައިގެން މަޅި ޖަހައިގެން ނޫންވީމައެވެ.
