ރައީސް އަބްދުﷲ ޔާމީން އަބްދުލްގައްޔޫމަކީ މި ސަރުކާރުގެ ފުރިހަމަ ބައިވެރިއެއް ކަމަށް 20 ވަނަ ރައްޔިތުންގެ މަޖިލިސް އިންތިޚާބްގައި ނައިފަރު ދައިރާގެ ގޮނޑިއަށް ރައީސް ޔާމީންގެ ތާއިދާއެކު އަމިއްލަ ގޮތުން ވާދަކުރައްވާ ކެންޑިޑޭޓް އަހްމަދު ޝާހް ވިދާޅުވެއްޖެއެވެ.
ޝާހް މިފަދައިން ވިދާޅުވެފައިވަނީ ޗެނަލް 13 ގެ އަދާހަމަ ލައިވް ޕްރޮގްރާމްގައި ވާހަކަދައްކަވަމުންނެވެ.
އެގޮތުން ޝާހް ވިދާޅުވީ މި ސަރުކާރުން މިހާ ހިސާބަށް ރައްޔިތުން ބަލައިގަތީ ރައީސް ޔާމީންގެ ވިސްނުންފުޅާ،ފިކުރުފުޅާ އެމަނިކުފާނުގެ ހުރި ޝަހުސިއްޔަތު އެންމެ ބޮޑަށް ވިއްކުމުންކަމަށެވެ.
ރައްޔިތުން ރައީސް ޔާމީން ބަލައިގަތީ ވެސް އެއްވެސް ސަބަބެއް ނެތި ނޫންކަމަށްވެސް ޝާހް ފާހަގަކުރެއްވިއެވެ.
ރައީސް ޔާމީނަކީ ކޮންމެ ގޮތެއް ވިޔަސް މި ސަރުކާރުގެ ބައިވެރިޔެއް. މި ސަރުކާރު ރައްޔިތުން ބަލައިގަތީ ރައީސް ޔާމީންގެ ވިސްނުންފުޅާ، ފިކުރުފުޅާ، އެމަނިކުފާނުގެ ޝަހުސިއްޔަތު އެންމެ ބޮޑަށް ވިއްކުމުން
ޝާހް
އޭނާ އިތުރަށް ވިދާޅުވީ ރައީސް ޔާމީނަށް ލިބުނު ކުޑަ ދައުރުގައި ވެސް އެމަނިކުފާނު ރައްޔިތުންގެ ހައްގުގައި ވެރިކަން ކޮށްދެއްވިކަމަށެވެ.
އޭގެއިތުރުންވެސް ޝާހް ވިދާޅުވީ އެމަނިކުފާނުގެ ސަބަބުން ވެރިކަމަށް އައި ބަޔަކު މިއަދު އެންމެ އިސްކަމެއް ދޭން ޖެހޭނީ ގާނޫނީ އިމުގެ ތެރެއިން އެމަނިކުފާނު މިނިވަންކުރުންކަމަށެވެ.
