ކާފިރުންގެ އީދުތަކުގައި ބައިވެރިނުވާން ހުކުރު ހުތުބާގައި އެންގުމަށްފަހު އައު އަހަރު ފާހަގަކުރަން މުންކަރާތްތައް ބޭއްވުމަކީ މުނާފިގުންގެ ސިފައެއް ކަމަށް ދީނީ އިލްމުވެރިޔާ އައްޝައިޚު ފަޒްލޫން ބިން މުހައްމަދު ވިދާޅުވެއްޖެއެވެ.
ޝައިޚު މިފަދައިން ވިދާޅުވީ، ކުރެއްވި ޓްވީޓެއްގައެވެ. ޝައިޚުގެ ޓްވީޓުގައި ވަނީ ނަސާރާއިން ފާހަގަކުރާ ކުރިސްމަސް ފާހަގަކުރުމުގައި ދިވެހިން ބައިވެރިނުވުމަށް ނަސޭހަތްތެރިވެ މިދިޔަ ހަފްތާގެ ހުކުރު ޚުތުބާގައި ނަސޭހަތްދީފައިވާވުމަށް އިޝާރާތްކުރައްވާފައެވެ.
އެގޮތުން އެ ހުތުބާގައި ނަސާރާއިންގެ އެ އީދުގައި ބައިވެރިވުމަކީ މުންކަރާތެއްގެ ގޮތުގައި ފާހަގަކޮށް ދީފައިވާ ނަސޭހަތުގެ ހަނދާން އައުކރުައްވާ ޝައިޚު ވިދާޅުވީ، ހުކުރު ޚުޠުބާގައި ކާފިރުންގެ ޢީދުތައް ފާހަގަކުރުމުން ދުރުހެލިވުމަށް ގޮވާލުމަށްފަހު، ދެން އިއުލާން ކުރި ބަންދު ދުވަސްތަކުގެ ލިސްޓުގައި މީލާދީ އާ އަހަރުގެ މުނާސަބަތުގައި ދުވަހެއް ބަންދުކަމުގައި އިއުލާންކޮށް، އަދި ސަރުކާރު ފަރާތުން ގިނަގުނަ ވެގެންވާ މުންކަރާތްތަކާއެކު އެދުވަސް ފާހަގަކުރުމުން އެ ލިބިގަނެވެނީ މުނާފިޤުންގެ ސިފައެއް ކަމަށް ވިދާޅުވެފައެވެ.
ހަމައެހެންމެ މީގެ ސަބަބުން މުޖުތަމަޢުގައި އުފެދިގެންދަނީ ފަސާދަ ކަމަށާ މީސްތަކުން ދީނާ ދުރުވެގެންދަނީ މިފަދަ މުނާފިޤު ސިފަތަކުގެ ސަބަބުން ކަމަށްވެސް ޝައިޚު ފަޒްލޫން ވަނީ ވިދާޅުވެފައެވެ.
ޝައިޚު ފަޒްލޫނު މިފަދައިން ވިދާޅުވެފައިވާއިރު، މިފަދަ މުންކަރާތްތައް ވެރިން ހިންގާއިރު އެކަންކަން މަނާކުރަން ތިބޭ އިލްމުވެރިން ބަސްނުބާތީ އަދި ސަރުކާރު ޒިންމާދާރު ނުކުރވާތީ ގިނަ ފާޑުކިޔުން އަމާޒުވެފައިވެސް ވެއެވެ.
