މާލެ ސިޓީގެ ޑެޕިއުޓީ މޭޔަރުކަމުގައި ހުރެ މިއަދު ޔޫތު މިނިސްޓަރުގެ އެޑްވައިޒަރު އަހުމަދު ނަރީޝު، މާލޭ ސިޓީގެ އޭރުގެ ސެކެރެޓަރީ ޖެނެރަލް މަގާމުން ދުރުކުރީ ގޯސްކޮށްކަމަށް ކަނޑައަޅައިފިއެވެ.
ވަޒިފާއާ ބެހޭ ޓްރައިބިއުނަލް އިން އެ ނިންމުން ނިންމާ މިދިޔަ ބުދަ ދުވަހު ވަނީ ވަޖީހު މަގާމުން ވަކިކުރީ ވަޒީފާއާބެހޭ ގާނޫނުގެ ދަށުން މުވައްޒަފަކު ވަކިކުރަން ޖެހޭ މައުޟޫއީ އަދުލުވެރިކަން ގާއިމް ނުކޮށް ކަމަށް ބުނެފައެވެ.
ވަޖީހު މަގާމުން ވަކިކުރީ މާލޭ ސިޓީ ކައުންސިލުން އެކިއެކި ފަރާތްތަކަށް ނުދައްކައި އޮތް 240 މިލިއަނަށްވުރެ ގިނަ ރުފިޔާ، އުސޫލުތަކުގެ ބޭރުން ދެއްކުމަށް އޭނާ ދެކޮޅު ހެއްދެވުމުން، ނަރީޝްގެ ހުށަހެޅުމަކަށް ރައީސް މުހައްމަދު މުއިއްޒަށް ތާއީދު ކުރާ ކައުންސިލަރުންގެ ވޯޓާއެކު އޮގަސްޓް 15، 2024ގައިއެވެ.
ވަޖީހުގެ ކޮންޓްރެކްޓްގެ މުއްދަތު ހަމަވުމުގެ ކުރިން މަގާމުން ވަކިކޮށްފައިވާތީ އޭނާއަށް ލިބުނު ގެއްލުމުގެ ބަދަލުގެ ގޮތުގައި، އޭނާ މަގާމުން ވަކިކުރި ދުވަހުން ފެށިގެން، އޭނާ އައު ވަޒީފާއެއް އަދާކުރަން ފެށި ދުވަހާ ހަމައަށް މުސާރައާއި އިނާޔަތްތައް ދިނުމަށް ޓްރައިބިއުނަލުން ވަނީ އަންގާފައެވެ.
އައު ވަޒީފާއެއް ލިބުނު ދުވަހާއި ހަމައަށް ނަސީރަށް ނަގައިދީފައިވަނީ 239،026 ރުފިޔާއެވެ. މި ފައިސާ ބަންދު ނޫން 30 ދުވަހުގެ ތެރޭގައި އޭނާއަށް ދެއްކުމަށް ވަނީ އަންގައިފައެވެ.
