މި އަހަރުގެ ރޯދަ މަހާއި ޝައްވާލު މަހުގެ ފުރަތަމަ ހަތް ދުވަހުގެ ތެރޭގައި ފެމިލީ ކޯޓުން ކައިވެނި ކޮށްދޭނެ ގަޑިތައް އާންމުކޮށްފި އެވެ.

އެ ކޯޓުން ހާމަކޮށްފައިވާ ގޮތުގައި ރޯދަ މަހުގެ ތެރޭގައި ކޯޓުގައި ކައިވެނިކޮށްދޭނީ ރަސްމީ ދުވަސްތަކުގެ ހެނދުނު 9:30 އިން 12:30 އަށް އަދި ރޭގަނޑު 21:30 އިން 23:30 އަށް ކަމަށެވެ. ކޯޓުން ބޭރުގައި ކައިވެނިކޮށްދޭނީ ކޮންމެ ދުވަހެއްގެ 21:30 އިން 23:30 އަށް ކަމަށެވެ.

ރޯދަ މަހުގެ އިތުރުން ޝައްވާލު މަހުގެ ފުރަތަމަ ހަތް ދުވަހުގެ ތެރޭގައި ކައިވެނިކޮށްދޭ ގަޑިތަކަށް ވެސް ފެމިލީ ކޯޓުން ވަނީ ބަދަލު ގެނެސްފަ އެވެ. އެގޮތުން އެ ދުވަސްތަކުގައި ކޯޓުގައި ކައިވެނިކޮށްދޭނީ ރަސްމީ ދުވަސްތަކުގެ ހެނދުނު 09:30 އިން 12:30 އަށް އަދި ހަވީރު 16:00 އިން 17:30 އަށެވެ.

އެ ދުވަސްތަކުގައި ރޭގަނޑު ކައިވެނިކޮށްދޭނީ ކޮންމެ ދުވަހެއްގެ 19:30 އިން 21:30 އަށް ކަމަށް ފެމިލީ ކޯޓުން ވަނީ ހާމަކޮށްފަ އެވެ.

ކުރިއަށް އޮތް ރޯދަ މަހާއި ޝައްވާލު މަހުގެ ފުރަތަމަ ހަތް ދުވަހުގައި ސަރުކާރުގެ ރަސްމީ މަސައްކަތު ގަޑިއަކީ ހެނދުނު 9:00 އިން މެންދުރުފަހު 1:00 އެވެ.