މީގެ ތިން އަހަރު ކުރިން ކައިވެންޏެއް ކޮށް، ވަރިވީއިރު ވެސް އެ ކައިވެންޏަށް ރަނުގެ ގޮތުގައި ދޭން އެއްބަސްވި 85،000 ރުފިޔާ ނުދީވާތީ އެ ހޯދައިދިނުމަށް ކޯޓުން ހުކުމެއް ކޮށްފިއެވެ.

ފެމިލީ ކޯޓަށް މި މައްސަލަ ހުށަހެޅީ ކައިވެނި ރޫޅުނު ފަހުން ވެސް ކައިވެނީގެ ރަަނަށްވާ 85،000ރ. މިހާތަނަށް ދީފައި ނުވާތީ އާއި ކައިވެނިކޮށްގެން އުޅުނުއިރު ވެސް އެއްވެސް ހަރަދެއް ކޮށްފައި ނުވާތީ މި ފައިސާ އެކީ އެއްފަހަރާ ދީ ހަލާސްކުރުމަށް އެދިއެވެ.

މި މައްސަލަ ރައްދުވާ ފަރާތަކީ މަސްތުވާތަކެތީގެ ވަބާގައި ޖެހިގެން ފަރުވާ ހޯދަމުންދާ މީހެއް ކަމަށްވާއިރު، އޭނާ ވަނީ މިވަގުތު ހާލަތު ހުރިގޮތުން ކައިވެނީގެ ރަނުގެ ގޮތުގައި ހޯދުމަށް އެދުނު ފައިސާ އެކީ އެއް ފަހަރާ ދެވެން ނެތް ކަމަށް ބުނެފައެވެ.

ނަމަވެސް އަންހެން މީހާގެ ފަރާތުން ވަނީ، އެ ފައިސާ އެކީ އެއް ފަހަރާ ދެއްކުމަށް އެދިފައެވެ.

ކޯޓަށް ހުށަހެޅިފައިވާ އެ މައްސަލައާއި ގުޅިގެން އިސްގާޒީ އިބްރާހިމް މާހިރު ކުރެއްވި ހުކުމުގައި ވަނީ މިމަހުން ފެށިގެން ކުރިއަށް އޮތް 10 މަހު، ކޮންމެ މަހަކު 8،500 ރުފިޔާ ދައްކާ ގޮތަށް، ރަނަށް ކިޔާފައިވާ ޖުމްލަ އަދަދު ދައްކާ ހަލާސް ކުރުމަށެވެ.