ގެވެށި އަނިޔާގެ މައްސަލަތަކުގައި ރައްކާތެރިކަމުގެ އަމުރަށް އެދޭއިރު ނަގާ 25 ރުފިޔާގެ ފީ ކަނޑާލައިފި އެވެ.
މިދިޔަ ބުރާސްފަތި ދުވަހު ފެމެލީ ކޯޓުން އާންމުކުރި، ގެވެށި އަނިޔާގެ މައްސަލަތަކާއި ގުޅިގެން ރައްކާތެރިކަމުގެ އަމުރަށް އެދި ހުށަހަޅާ ފޯމުގައި، ކުރިން ނަގަމުން ދިޔަ 25 ރުފިޔާގެ ފީ ދެއްކުމަށް ހިމަނާފައެއް ނުވެ އެވެ. އަދި ކުރިން 14 ސަފުހާ ހިމެނޭ އެ ފޯމު މިހާރު ވަނީ ހަ ސަފުހާއަށް ބަދަލުކޮށްފަ އެވެ.
އެ ފީ ކަނޑާލަން ނިންމިކަން ހާމަކުރީ ޕްރޮސެކިއުޓާ ޖެނެރަލް ހުސެއިން ޝަމީމް އޭނާގެ ބްލޮގުގައި ޝާއިއުކުރި ލިޔުމެއްގައިކަން ފާހަގަކޮށްލެވެއެވެ.
އޭގެ އިތުރުން ގެވެށި އަނިޔާގެ މައްސަލަތަކުގައި ރައްކާތެރިކަމުގެ އަމުރު ނެރެދިނުމަށް ހުށަހަޅާ ފޯމާއެކު، ހުރިހާ ލިޔުމެއް ހުށަހެޅުމަކީ ވެސް، ރައްކާތެރިކަމުގެ އަމުރަކަށް އެދި ހުށަހަޅާ މީހަކަށް ނުވެދާނެ ކަމެއް ކަމަށާއި، އެ ހުރިހާ ލިޔުމެއް ނެތި ކުރިން ފޯމު ބަލައި ނުގަތަސް އެކަން ވެސް ބަދަލުކޮށްފައި އޮތް ކަމަށް ޝަމީމް ވަނީ ވިދާޅުވެފައެވެ.
އަނިޔާ ލިބޭ މީހާއަށް އިތުރަށް ފަސޭހަ ކޮށްދިނުމަށްޓަކައި، ގެވެށި އަނިޔާއިން ރައްކާތެރިކުރުމުގެ އަމުރަށް އެދޭ ފޯމު، ޕީޖީ އޮފީހުގެ އޮންލައިން ޕޯޓަލްގެ ތެރެއިން ފުރޭނޭ ގޮތް ހަމަޖައްސާނެ ކަމަށް ޕީޖީ ޝަމީމް ވިދާޅުވި އެވެ.