ކައިވެނި ރޫޅުމަށް ފަހު، އެ ކައިވެންޏަށް ލިބިފައިވާ ދަރިންގެ ހަރަދަށް ބައްޕަ ދޭންޖެހޭ 2000 ރުފިޔާއިން ހަދަދުތައް ފޫނުބެއްދޭތީ މަޖިލީހުގެ ގަވާއިދު ކޮމިޓީ މެދުވެރިކޮށް ކަމާގުޅޭ އިދާރާތަކާ ބައްދަލުކޮށް ގަވާއިދު ބަދަލުކުރަން ގަލޮޅު އުތުރު ދާއިރާގެ މަޖިލިސް މެމްބަރު މުހައްމަދު އިބްރާހީމް(ކުޑޫ) އެދިވަޑައިގެންފި އެވެ.
އޭނާ މިފަދައިން އެދިވަޑައިގަތީ މަޖިލީހުގެ ރައީސް އަބްދުއްރަހީމް އަބްދުﷲއަށް ފޮނުއްވި ސިޓީއެއްގަ އެވެ.
އާއިލާއާ ބެހޭ ގާނޫނުގެ 72ވަނަ މާއްދާގައި ވާގޮތުން ކުއްޖާ ބެލެހެއްޓުމުގެ ހަރަދަށް ކޮންމެ މަހަކު 2000 ރުފިޔާ ބައްޕަ ދޭންޖެހެ އެވެ. އަދި އިތުރުވާ ކޮންމެ ކުއްޖަކަށް 1000 ރުފިޔާ ދޭންޖެހެއެވެ.
ފައިސާގެ އިތުރުން ދަރިންނަށް ކޮށްދޭންޖެހޭ ހަރަދުތައް:
އެންމެ ކުޑަމިނުން ސްކޫލު ފީ އާއި ޓިއުޝަން ފީތަކަށް އެކަނި ވިޔަސް 2،000ރ. އަކުން ނުފުއްދޭނެ އެވެ. ކުޑަކުދިންނަށް ކާންދޭ ތަކެތީގެ އިތުރުން ނެޕީގެ ހަރަދުތަކަށް އެކަނި ބެލިޔަސް މި ފައިސާ އިން ނުފުދޭނެ އެވެ،
އެ ސިޓީގައި ކުޑޫ ވިދާޅުވި އެވެ.
މެމްބަރު މުހައްމަދު ވިދާޅުވެފައިވާގޮތުގައި މިއީ ތަކެތީގެ އަގު އިންތިހާއަށް އުފުލިފައިވާ ދުވަސްވަރެއްގައި ވަރަށް ކުޑަ ހަރަދެކެވެ. ހަމައެކަނި ކުއްޖާއަށް ބޭނުންވާ ނެޕީ އާއި ކާންދޭ ތަކެތި ވެސް މި ހަރަދުން ފަރުނުޖެއްސޭނެކަން ފާހަގަ ކުރެއްވި އެވެ.
އެހެންވެ މަޖިލީހުގެ ރައީސް އަރިހުން އޭނާ އެދިވަޑައިގެންނެވީ، މަޖިލީހުގެ ގަވައިދު ކޮމިޓީ މެދުވެރިކޮށް، މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމެންޓްއާ ބައްދަލުކޮށް، އެ ގަވައިދަށް އިސްލާހީ ބަދަލު ގެންނެވުމަށެވެ.
