އެއް އަންހެނަކު ކޯޓުގައި ރަޖިސްޓަރީ ކުރުމެއް ނެތި ތިން ކައިވެންޏެއް ކުރުމުގެ ސަބަބުން އެ މީހާގެ ތިން ފިރިން ތިބި މައްސަލަތަކެއް ކޯޓުތަކުގައި އެބައޮތް ކަމަށް ފެމިލީ ކޯޓުން މިއަދު ބުނެފި އެވެ.

މިމައްސަލަ ފެންމަތިވީ ރައްޔިތުންގެ މަޖިލީހުގެ ގަވާއިދު ކޮމިޓީގެ މިއަދުގެ ބައްދަލުވުމަށް ފެމިލީ ކޯޓުގެ ލީގަލް އޮފިސަރު އަހްމަދު މައުސޫމު ހާޒިރުވެ ދެއްކެވި ވާހަކަތަކެއްގެ ތެރެއިންނެވެ.

އެކަމާ ގުޅޭ ގޮތުން ވާހަކަ ދައްކަވަމުން މައުސޫމް ވިދާޅުވީ ބޭރު ގައުމުތަކަށް ގޮސް ކޯޓުން ބޭރުގައި ކައިވެނިކޮށް، ފެމެލީ ކޯޓުގައި ކައިވެނި ރަޖިސްޓްރީ ނުކޮށް ތިބުމުގެ ސަބަބުން އެއް އަންހެނެއްގެ ތިން ފިރިން ހުރި މައްސަލައެއް ވެސް ދިމާވެފައިވާ ކަމަށެވެ.

ދެވަނަ ކައިވެނި ރަޖިސްޓަރީ ކުރަން ކޯޓަށް ހުށަހެޅިއިރު ފުރަތަމަ ކައިވެނީގެ ލިޔުންތައްވެސް ކޯޓުގައި ހުރި ކަމަށާއި އެކަން ކޯޓުން ބަލަައި ގޮތްތަކެއް ނުނިންމަނީސް އަންހެން މީހާ ތިންވަނަ ކައިވެންޏެއްވެސް ކޮށްފައިވާ ކަމަށްވެސް މައުސޫމު ވިދާޅުވި އެވެ.

މައުސޫމް ވިދާޅުވީ ރާއްޖޭން ބޭރުގައި ކައިވެނިކުރަން ބޭނުންވި ނަމަވެސް ފެމެލީ ކޯޓުގެ ހުއްދައެއް ހޯދަން ޖެހޭނެ ކަމަށެވެ. ނަމަވެސް ހުއްދަ ނުނަގާ ކުރާ މިފަދަ ކައިވެެނިތައް އިތުރުވަމުންދާ ކަމަށްވެސް ވިދާޅުވި އެވެ.