ދުނިޔޭގެ އެންމެ ބޮޑު ޖަޒީރާ ކަމަށްވާ ގްރީންލޭންޑް އަތުލުމަށް އެމެރިކާގެ ރައީސް ޑޮނަލްޑް ޓްރަމްޕް ބުނަމުންދާއިރު، އެ ސަރަހައްދުގެ ސިޔާދަތީ މިނިވަންކަމަށް އުނިކަން އަންނަ ފަދަ އެއްވެސް އަމަލެއް އެމެރިކާއިން ހިންގައިފިނަމަ، ޑެންމާކުން ފަސްޖެހުމެއް ނެތް ހަރުކަށި ފިޔަވަޅު އަޅާނެ ކަމަށް ބުނެ އިންޒާރު ދީފިއެވެ.

މި މައްސަލައާ ގުޅިގެން ޑެންމާކުގެ ދިފާއީ ބާރުތަކުންނާއި ސިޔާސީ އިސް ފަރާތްތަކުން ހާމަކޮށްފައިވާ ގޮތުގައި، ގްރީންލޭންޑަކީ ޑެންމާކުގެ ބާރުގެ ދަށުގައި އޮތް މިނިވަން ސަރަހައްދެކެވެ. އަދި އެއްވެސް ބާރަކުން ހުއްދަ ނެތި އެ ސަރަހައްދަށް ވަދެގަންނަން އުޅެފިނަމަ، "ފުރަތަމަ ބަޑިޖަހާފައި، ސުވާލުކުރާނީ ފަހުން" ކަމަށް ބުނެ، ޑެންމާކުން ވަނީ އެމެރިކާއަށް ސީދާ އިންޒާރެއް ދީފައެވެ.

މި މައްސަލަ ހޫނުވެފައިވަނީ، އެމެރިކާގެ ރައީސް ޑޮނަލްޑް ޓްރަމްޕް، ގްރީންލޭންޑަކީ އެމެރިކާއަށް އިސްތިރާތީޖީ ގޮތުން މުހިންމު ތަނެއް ކަމަށާއި، ގްރީންލޭންޑް އަތުލުމަށް ޝައުގުވެރިވާ ކަމަށް ވިދާޅުވުމާ ގުޅިގެންނެވެ. ޓްރަމްޕްގެ މި ވާހަކަފުޅަށް ރައްދު ދެމުން ޑެންމާކުގެ ބޮޑުވަޒީރު ވަނީ އެއީ "ބޭކާރު" ވާހަކައެއްގެ ގޮތުގައި ސިފަކުރައްވައި، ގްރީންލޭންޑަކީ އަތުލަން އޮތް ތަނެއް ނޫން ކަމަށް ބަޔާންކުރައްވާފައެވެ.

އާކްޓިކް ސަރަހައްދުގައި އޮންނަ ގްރީންލޭންޑަކީ ގުދުރަތީ މުއްސަނދިކަމާއި، މައުދަނުތަކުން މުއްސަނދިވެފައިވާ ތަނެކެވެ. އެމެރިކާއިން މި ސަރަހައްދަށް ލޯ އަޅަމުންދަނީ ރަޝިޔާއާއި ޗައިނާގެ ނުފޫޒު އެ ސަރަހައްދުގައި ގަދަވަމުންދާތީ، އެކަން ހުއްޓުވައި އެމެރިކާގެ އަސްކަރީ ބާރު ގަދަ ކުރުމުގެ ބޭނުމުގައެވެ. ނަމަވެސް ޑެންމާކުން ބުނަމުންދަނީ ގްރީންލޭންޑްގެ މިނިވަންކަމާ ކުޅުމުގެ ފުރުސަތު އެއްވެސް ގައުމަކަށް ނޯންނާނެ ކަމަށެވެ.

މި ހަމަނުޖެހުމުގެ ސަބަބުން ދެ ގައުމުގެ ދެމެދުގައި އޮތް ޒަމާންވީ ސިޔާސީ ގުޅުމަށް ވަނީ ބޮޑެތި ގޮންޖެހުންތަކެއް ކުރިމަތިވެފައެވެ.