އެމެރިކާއިން ގްރީންލޭންޑް ހިފުމަށް މަސައްކަތް ކުރަމުންދާ ކަމަށް އެ ގައުމުގެ ރައީސް ޑޮނާލްޑް ޓްރަމްޕް ބުނަމުން ދިޔުމާއި ގުޅިގެން، އެ ސަރަހައްދުގެ ސަލާމަތްތެރިކަން ކަށަވަރު ކުރުމަށްޓަކައި އިނގިރޭސިވިލާތާއި، ޖަރުމަނު އަދި ފްރާންސް ގުޅިގެން ގްރީންލޭންޑަށް އަސްކަރީ ބާރެއް ފޮނުވުމުގެ ތައްޔާރީތައް ފަށައިފިއެވެ.

އިނގިރޭސިވިލާތުގެ "ދަ ޓެލެގްރާފް" ނޫހުން ރިޕޯޓްކޮށްފައިވާ ގޮތުގައި، އިނގިރޭސި އޮފިޝަލުން މިހާރު ވަނީ ޖަރުމަނާއި ފްރާންސްގެ ސަރުކާރާ އެކު މިކަމާ ގުޅޭ މުހިންމު މަޝްވަރާތަކެއް ބާއްވާފައެވެ. މި ބައްދަލުވުންތަކުގެ ބޭނުމަކީ ގްރީންލޭންޑަށް އަސްކަރީ ސަފުތަކެއް ފޮނުވައި، އެމެރިކާގެ ނުފޫޒުން އެ ސަރަހައްދު ސަލާމަތް ކުރުމެވެ.

މިފަދަ ފިޔަވަޅެއް އަޅަން ވިލާތުގެ ގައުމުތަކުން ނިންމާފައި މިވަނީ، އެމެރިކާއިން ގްރީންލޭންޑް އެ ގައުމުގެ ބާރުގެ ދަށަށް ގެނައުމަށްޓަކައި ސިއްރާއި ފާޅުގައި ތަފާތު މަސައްކަތްތަކެއް ކުރަމުންދާ ކަމަށް ތުހުމަތު ކުރެވޭ ދަނޑިވަޅެއްގައެވެ. ރިޕޯޓްތައް ބުނާ ގޮތުގައި އެމެރިކާއިން ދަނީ ގްރީންލޭންޑްގެ މުހިންމު ސަރަހައްދުތަކަށް އަތްގަދަ ކުރުމަށް ރޭވުންތަކެއް ރާވަމުންނެވެ.

މި މައްސަލައިގައި އެންމެ ފާހަގަކޮށްލެވޭ ކަމަކީ، އެމެރިކާ ހިމެނޭ އަސްކަރީ އިއްތިހާދު "ނޭޓޯ" އިން ވެސް މިހާރު އެމެރިކާއާ ދެކޮޅަށް ތެދުވެފައިވާ ކަމެވެ. ނޭޓޯގެ މެންބަރު ގައުމުތަކުން ގަބޫލުކުރާ ގޮތުގައި އެމެރިކާގެ މި އަމަލަކީ ބައިނަލްއަގުވާމީ ހަމަޖެހުމަށް އޮތް ނުރައްކަލެކެވެ.

ގްރީންލޭންޑަކީ ސްޓްރެޓީޖިކް ގޮތުން މުހިންމު ސަރަހައްދަކަށް ވާއިރު، އެމެރިކާއިން އެތަން ހިފަން އުޅޭ ކަމަށް ފެތުރިފައިވާ ޚަބަރުތަކާއެކު، ދުނިޔޭގެ ބޮޑެތި ބާރުތަކުގެ މެދުގައި ވަނީ ނުތަނަވަސްކަން އިތުރުވެފައެވެ. ވިލާތުގެ ގައުމުތަކުން މިހާރު ތައްޔާރުވަމުންދަނީ ކޮންމެ ވަގުތެއްގައި ވެސް ގްރީންލޭންޑަށް އަސްކަރީ އެހީތެރިކަން ފޯރުކޮށްދިނުމަށެވެ.