ޑރ މުހައްމަދު މުއިއްޒު އެދިވަޑައިގެން ސަރުކާރާ އަދި ރައްޔިތުންގެ މަޖިލިސް އެމަނިކުފާނުގެ ޕާޓީއަށް ދިނުމުން ވެސް ރައްޔިތުންނަށް އަނބުރާ ލިބުނީ ދޮގާ މަކަރާ ކޮރަޕްޝަން ކަމަށް ވިދާޅުވެ، ކުރީގެ ނައިބު ރައީސް ޑރ މުހައްމަދު ޖަމީލު އަހުމަދުގެ ނުރުހުން ސަރުކާރަށް އަމާޒުކުރައްވައިފިއެވެ.

ޑރ ޖަމީލު އެކްސްގައި ކުރެއްވި ޕޯސްޓެއްގައި ވިދާޅުވީ، ސަރުކާރުގެ ވިސްނުމާ އަދި ސިޔާސަތު އޮތް ގޮތް މާލޭ ސިޓީ ކައުންސިލްގެ 4 ޖަލްސާ ޕީއެންސީގެ ކައުންސިލަރުން ކެންސަލް ކުރުމުން އެނގިގެންދާ ކަމަށެވެ.

ރައީސް މުހައްމަދު މުއިއްޒު ބޭނުންވަނީ ރައްޔިތުންގެ ބާރު ކަނޑުވާލަން ކަމަށާ ޖަވާބުދާރީ ނުވެ ފަރު ޖައްސަން ކަމަށްވެސް ޑރ ޖަމީލު ވަނީ ވިދާޅުވެފައެވެ. ރައީސް މުއިއްޒަށް ކައުންސިލްތައް ދޭން ނުޖެހޭ ސަބަބު މާލޭ ސިޓީ ކައުންސިލުން އެކަނިވެސް ސާފުވާ ކަމަށް ވިދާޅުވެ ޑރ ޖަމީލު ވަނީ ރައްޔިތުންގެ މަޖިލިހާ ސަރުކާރު ދިނުމުން ވެސް ރައީސް މުއިއްޒު ރައްޔިތުންނަށް ދިނީ ދޮގާ މަކަރާ ކޮރަޕްޝަންގެ ހަދިޔާ ކަމަށް ވިދާޅުވެ ސަރުކާރަށް ނުުރހުން އަމާޒުކުރައްވާފައެވެ.

ޑރ ޖަމީލު މިފަދައިން ވިދާޅުވެފައިވާއިރު، ކުރިއަށް އޮތް ކައުންސިލް އިންތިހާބު ޕީއެންސީއަށް ލިބިގެން މެނުވީ ރަށްރަށަށް ތަރައްގީ ނުގެނެވޭނެ ކަމަށް ބުނަމުންކަން ފާހަގަކޮށްލެވެއެވެ.