ޣައްޒާގެ އިންތިޤާލީ ވެރިކަން ހިންގުމަށްޓަކައި އެކުލަވައިލާ "ސުލްޙައިގެ ބޯޑު"ގެ މެންބަރަކަށް ވުމަށް، ތުރުކީވިލާތުގެ ރައީސް ރަޖަބް ޠައްޔިބް އެރްދޮޣާނަށް އެމެރިކާގެ ރައީސް ޑޮނަލްޑް ޓްރަމްޕް ދަޢުވަތު އަރުވައިފިއެވެ.
މި ދަޢުވަތަކީ މިދިޔަ އަހަރުގެ އޮކްޓޫބަރު މަހުގެ 10 ވަނަ ދުވަހު ޙަމާސް ޖަމާޢަތާއެކު ވެފައިވާ ހަނގުރާމަ ހުއްޓައިލުމުގެ އެއްބަސްވުމުގެ ދަށުން ޣައްޒާގައި ވެރިކަން ކުރާނެ އިންތިޤާލީ ކޮމިޓީއެއް އެކުލަވައިލުމަށް ނިންމާފައިވާ ނިންމުމާ ގުޅިގެން ދެއްވި ދަޢުވަތެކެވެ.
މި އެއްބަސްވުމުގައިވާ ގޮތުން ޣައްޒާގައި އުފައްދާ އިންތިޤާލީ ކޮމިޓީގެ މައްޗަށް ބާރު ފޯރުވާނީ ރައީސް ޓްރަމްޕްގެ ސީދާ ބެލުމުގެ ދަށުން އުފައްދާ "ސުލްޙައިގެ ބޯޑު"ންނެވެ. އަދި މި ބޯޑުގެ ރިޔާސަތު ބަލަހައްޓަވާނީ ސީދާ ޓްރަމްޕް ކަމަށް އޭނާ ވަނީ މީގެ ކުރިން އިޢުލާނު ކުރައްވާފައެވެ.
ޓްރަމްޕް، ރައީސް އެރްދޮޣާނަށް މިފަދަ ދަޢުވަތެއް އެރުވި ނަމަވެސް، އެ ދަޢުވަތު އެރްދޮޣާން ޤަބޫލުފުޅު ކުރެއްވި ކަމެއް ތުރުކީގެ ވެރިރަށް އަންކާރާއިން އަދި ރަސްމީކޮށް ހާމަކޮށްފައެއް ނުވެއެވެ.
މި ބޯޑަކީ ޣައްޒާގެ މުސްތަޤްބަލާ މެދު ގޮތްތަކެއް ނިންމުމަށާއި، ސަރަޙައްދީ ހަމަޖެހުން ޤާއިމުކުރުމަށްޓަކައި އެމެރިކާ އިސްވެ އޮވެ ކުރިއަށްގެންދާ މަސައްކަތެއްގެ ގޮތުގައި ވަނީ ފާހަގަކުރެވިފައެވެ. ނަމަވެސް، އިސްލާމީ އުންމަތުގެ މުހިންމު ލީޑަރެއްގެ ގޮތުގައި ބެލެވޭ އެރްދޮޣާން މި ބޯޑުގައި ބައިވެރިވެވަޑައިގަތުމާ މެދު ނިންމަވާ ގޮތަކަށް ބައިނަލްއަޤްވާމީ މުޖުތަމަޢުން ދަނީ ވަރަށް ބޮޑަށް އިންތިޒާރު ކުރަމުންނެވެ.
