ޕީއެންސީގެ ޓިކެޓުގައި މާލެ ސިޓީ ކައުންސިލްގެ މޭޔަރުކަމަށް ކެންޑިޑޭޓެއް ނެރެފައި ހުރި ނަމަވެސް ރައީސް ޑރ މުހައްމަދު މުއިއްޒުގެ އެޖެންޑާ އޮތީ މުޅިން އެހެން ގޮތަކަށް ކަމަށް ޕީއެންއެފްގެ ރައީސް، ރައީސް އަބްދުﷲ ޔާމީން ވިދާޅުވެއްޖެއެވެ.

އާދިއްތަ ދުވަހުގެރޭ ޕީއެންއެފުން ބޭއްވި ޓައުން ހޯލް ޖަލްސާގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ، ވެރިކަން ކުރާ ޕާޓީގެ ފަރާތުން މާލޭގެ މޭޔަރު ކަމަށް ނެރެފައިވާ މޫސާ އަލީ ޖަލީލަކީ ކަތިލާ ކަންބަޅިއެއް ކަމަށާއި ރައީސް މުހައްމަދު މުއިއްޒު ބޭނުންވަނީ މިހާރުގެ ވެސް މޭޔަރު އާދަމް އާޒިމް ހޮވެން ކަމެވެ.

ރައީސް ޔާމީން ވިދާޅުވާ ގޮތުގައި އެކަމުގެ ފަހަތުގައި އޮތް ސަބަބަކީ ރައީސް މުއިއްޒުގެ މޭޔަރުކަމުގައި ކައުންސިްލ ތެރޭގައި ހިންގާފައި ހުރި ކަންކަން ނުބަލާ އާދަމް އާޒިމް އެއް ދައުރު ނިންމާލުން ކަމަށްވުން ކަަމަށާ އެހެންކަމުން މުއިއްޒުއަށް ނަފްސުގެ ސަލާމަތްކަން އޮތީ ދެން ވެސް އާޒިމް އެ މަގާމުގައި ހުރެގެން ކަމަށްވުމަކީ ވެސް ސަބަބެއް ކަމަށް ރައީސް ޔާމީން ވިދާޅުވެފައިވެއެވެ.

ރައީސް ޔާމީން ވިދާޅުވީ ޖަލީލަކީ ޚިދުމަތްތެރި، ޝަރަފުވެރި، ނަމޫނާ ބޭފުޅެއް ކަމަށާއި މާލޭގެ މޭޔަރުކަމަށް ވަޑައިގަތުމަށް ޕީއެންސީން އެރުވި ފުރުސަތު ގަބޫލުކުރުމުން ހިތާމަ ކުރައްވާ ކަމަށެވެ.

ރައީސް ޔާމީން އިތުރަށް ވިދާޅުވީ، މާލޭގެ މޭޔަރު ކަމަށް އެމަނިކުފާނުގެ ތާއީދާއެކު އިސްމާއިލް ޒަރިޔަންދު ނެރުނީ އާޒިމްގެ ވެސް ދޯހަޅިކަމުން ކައުންސިލް އޮޑިޓުނުކޮށް ވައްކަމާ ކޮރަޕްޝަން އޮއްބާލާފައިވާތީ އެކަންކަން ތަހުގީގުކޮށް ފިޔަވަޅު އެޅުމަށް ކަމަށާ ޒަރިޔަންދުގެ ކިބައިގައި އެ ހިތްވަރާ ގާބިލުކަން ހުންނާނެ ކަމަށްވެސް ރައީސް ޔާމީން ވިދާޅުވިއެވެ.