މާލޭގެ އެކި ތަންތަނުގައި މީދާ ބޭސް ބަހައްޓަން މާލޭ ސިޓީ ކައުންސިލުން މިދިޔަ މަހު ކުރިއަށްގެންދިޔަ ޕްރޮގްރާމަށް 31،000 ރުފިޔާ ޚަރަދުވިއިރު، 80 މީދާ މަރުވެފައިވާ ކަމަށް ސިޓީ ކައުންސިލުން ބުނެފިއެވެ.
މީދާ މެރުމުގެ ހަރަކާތެއް ސިޓީ ކައުންސިލުން ފެށީ މިދިޔަ މަހު 16 ގައެވެ.
ސަން އޮންލައިނުން ހުށަހެޅި އާރްޓީއައިއަށް ޖަވާބުދެމުން ބުނީ، އެ ޕްރޮގްރާމްގެ ދަށުން 49 ތަނެއްގައި މީދާ ބޭސް ބަހައްޓާފައިވާ ކަމަށެވެ. މި މަހުގެ ހަތަރުވަނަ ދުވަހުގެ ނިޔަލަށް އެ ޕްރޮގްރާމްގެ ދަށުން ބެހެއްޓި މީދާ ބޭސްތަކުގެ ސަބަބުން 80 މީދާ މަރުވެފައިވާ ކަމަށް ވެސް ސިޓީ ކައުންސިލުން ބުނެފައިވެއެވެ.
އެ މުއްދަތުގައި އެ ޕްރޮގްރާމަށް ޚަރަދުކުރީ ޖުމުލަ 31،978.40 ރުފިޔާއެވެ. އެއީ، މީދާ ބޭސް ގަންނަން ޚަރަދުކުރި 30،596 ރުފިޔާއެއްގެ އިތުރުން އެ ޕްރޮގްރާމް ފެށުމުގެ ރަސްމިއްޔާތަށް ބޭނުންވާ ބެނާ ޕްރިންޓްކުރަން ޚަރަދުކުރި 1،382.40 ރުފިޔާއެވެ.
މީދާ މެރުމުގެ ނަމުގައި ސިޓީ ކައުންސިލުން 31،000 ރުފިޔާ ބޭނުންކުރުމުން ގިނަ ބަޔަކު އަންނަނީ ފާޑުކިޔުން އަމާޒުކުރަމުންނެވެ.
