މި ސަރުކާރަށް ދެ އަހަރު ވީއިރު ގެއްލުނު ކަނޑުގެ ސަރަހައްދު ހޯދުމަށް އެކަށީގެންވާ މަސައްކަތެއް ކޮށްފައި ނުވާ ކަމަށާއި އަނެއްކާވެސް އެ ވާހަކަ ރައީސް މުހައްމަދު މުއިއްޒު ދެއްކެވީ ރައްޔިތުންނަށް "ދަޅަ ދައްކަން" ކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެ އެވެ.
ރައީސް ޔާމީން މިފަދައިން ވިދާޅުވެފައި ވަނީ ބުރާސްފަތު ދުވަހުގެ ރޭ ޕީއެންއެފް އިން ބޭއްވި ޖަލްސާގައި ވާހަކަ ދައްކަވަމުންނެވެ.
ޖަލްސާގައި ރައީސް ޔާމީން ވަނީ މިދިޔަ ހަފްތާގައި ރައީސް މުއިއްޒު އިއްވެވި ރިޔާސީ ބަޔާނުގައި އެ މަނިކުފާނު ފޯޅަވައްސާ ގުޅޭ ގޮތުން ދެއްކެވި ވާހަކަފުޅަށް ފާޑުވިދާޅުވެފައެވެ.
ރިޔާސީ ބަޔާނުގައި ރައީސް މުއިއްޒު ވިދާޅުވީ، ފޯޅަވަހީގެ މައްސަލާގައި މޮރިޝަސްގެ ބޮޑުވަޒީރަށް ކުރީގެ ރައީސް އިބްރާހިމް މުހައްމަދު ސޯލިހު ފޮނުއްވި ސިޓީ އަނބުރާ ގެނައުމަށް ނިންމާފައިވާ ކަމަށެވެ.
އަދި އިޓްލޮސްގެ ނިންމުމަށް ގޮންޖައްސަވައި، ރާއްޖޭގެ ކަނޑުގެ ސަރަހައްދަކީ ދެކުނުން ދޫކޮށްލި ކަމަށް ބުނާ ސަރަހައްދާ އެކު 200 މޭލުން ފެށިގެން ކަމަށް ބަޔާން ކުރުމަށް ގާނޫނަށް އިސްލާހު ގެންނަވާނެ ކަމަށް އެ މަނިކުފާނު ވިދާޅުވި އެވެ.
މި ވާހަކަތަކާ ގުޅިގެން ރައީސް ޔާމީން ވިދާޅުވީ ވެރިކަމުގެ ކުރީކޮޅު ފާޑުކިޔުންތައް އަމާޒުވުމުން އޭރު އެކަމަށް ކޮމިޓީއެއް އެކުލަވާލައި މަސައްކަތް ފެށި ނަމަވެސް އެކަށީގެންވާ މަސައްކަތެއްކޮށްފައެއް ނުވާކަމަށެވެ. އަނެއްކާ ކޮމިޝަނެއް ހަދާތީ އެކަމަށް ރައީސް ޔާމީން ވަނީ ފާޑު ވިދާޅުވެފައެވެ.
