އެމެރިކާއިން އަޅާފައިވާ ހަރުކަށި އަދި ބޭއިންސާފު ފިޔަވަޅުތަކުގެ ސަބަބުން ކިއުބާއަށް ކުރިމަތިވެފައިވާ ހަކަތައިގެ ބޮޑު ތަދުން އަރައިގަތުމަށް އެހީތެރިވުމުގެ ގޮތުން، ރަޝިޔާއިން އެ ގައުމަށް ތެލާއި ތެޔޮ އުފެއްދުންތައް ފޮނުވުމަށް ތައްޔާރުވާން ފަށައިފިއެވެ.
ކިއުބާއަކީ ޒަމާނުއްސުރެ ވެނެޒުއެލާއިން ތެޔޮ އެތެރެކުރަމުން އައި ގައުމެއް ނަމަވެސް، އެމެރިކާއިން ވަނީ ވެނެޒުއެލާގެ ތެޔޮ ކިއުބާއަށް ގެންދިއުމަށް ހުރަސްއަޅައި، އެ މަގު ބަންދުކޮށްފައެވެ. އެމެރިކާގެ މި ނިންމުމުގެ ސަބަބުން ކިއުބާގެ އާންމު ދިރިއުޅުމަށާއި އިގްތިސާދަށް ވަނީ ނުހަނު ބޮޑަށް ނޭދެވޭ އަސަރުކޮށްފައެވެ. މިގޮތުން ކަރަންޓުގެ ޚިދުމަތް މެދުކެނޑުމާއި، އިންޖީނުގެތައް ހިންގުމަށް ބޭނުންވާ ތެޔޮ ނުލިބުމުގެ ސަބަބުން އެ ގައުމުގެ ރައްޔިތުން ދަނީ ބޮޑެތި ތަކްލީފުތަކެއް އުފުލަމުންނެވެ.
ރަޝިޔާ ސަރުކާރުން ހާމަކޮށްފައިވާ ގޮތުގައި، އެމެރިކާގެ ނުފޫޒުން ކިއުބާގެ ރައްޔިތުން ނިކަމެތިކޮށްލުމަށް ކުރަމުންދާ މަސައްކަތްތަކާ ދެކޮޅަށް ރަޝިޔާއިން ދެމިއޮންނާނެއެވެ. އަދި މި ދަނޑިވަޅުގައި ކިއުބާއަށް ބޭނުންވާ ތެލުގެ ޝިޕްމަންޓްތައް ފޮނުވުމަކީ އެ ގައުމުގެ ހަކަތައިގެ ރައްކާތެރިކަން ކަށަވަރުކުރުމަށް އެޅޭ މުހިންމު ފިޔަވަޅެއް ކަމަށް ރަޝިޔާއިން ގަބޫލުކުރެއެވެ.
ދުނިޔޭގެ ބާރުގަދަ ގައުމުތަކުން ކުދި ގައުމުތަކުގެ މައްޗަށް ނުފޫޒު ފޯރުވައި، އިގްތިސާދީ ގޮތުން ދަތިކުރުމުގެ ސިޔާސަތުތައް އެމެރިކާއިން ގެންގުޅެމުންދާއިރު، ރަޝިޔާގެ މި ނިންމުމަކީ ކިއުބާގެ ސިޔާދަތީ މިނިވަންކަމަށް ލިބުނު ބޮޑު އެހީތެރިކަމެއްގެ ގޮތުގައި މަސްރަހު ދިރާސާކުރާ ފަރާތްތަކުން ސިފަކުރެއެވެ. ކިއުބާ ސަރުކާރުން ވެސް ވަނީ މި ދަތި އުނދަގޫ ވަގުތުގައި ރަޝިޔާއިން ފޯރުކޮށްދޭ އެހީތެރިކަމަށް ޝުކުރު އަދާކޮށްފައެވެ.
