މާލޭ ސިޓީގެ މޭޔަރުކަމުގެ އިންތިޚާބުގައި ވާދަކުރައްވާ ގައުމީ ކެންޑިޑޭޓް އިސްމާއިލް ޒަރިޔަންދު، މާލޭގެ މުސްތަޤުބަލާ މެދު ގެންގުޅުއްވާ ތަސައްވުރު ހާމަކުރައްވައިފިއެވެ.

އެކްސްގައި ކުރެއްވި ޕޯސްޓެއްގައި ޒަރިޔަންދު ވިދާޅުވީ، މާލޭގެ ތަރައްޤީއަށް ބޭނުންވާ ކެޕިޓަލް ޚަރަދުތަކާއި، ރައްޔިތުންގެ ވަސީލަތްތައް ބިނާކުރުމަށް ކުރެވޭ ހޭދަ ހަމަޖައްސާނީ ލިބޭ އާމްދަނީގެ ތެރެއިން ކަމަށެވެ.

މީގެ ތެރޭގައި މާލެއަށް ދިމާވެފައިވާ އެންމެ ބޮޑު އެއް މައްސަލަ ކަމަށްވާ ޓްރެފިކް ތޮއްޖެހުން ހައްލުކުރުމަށް ކުރަންޖެހޭ ޚަރަދުތައްވެސް ހިމެނެއެވެ.

އިޖުތިމާއީ އަދި އިޤްތިސާދީ ކުރިއެރުމަށް ބާރުއެޅުއްވުމުގެ ގޮތުން، ޚާއްސަ އެހީއަށް ބޭނުންވާ ފަރާތްތަކަށް އެހީތެރިކަން ފޯރުކޮށްދިނުމާއި، ކުދި ވިޔަފާރިތަކަށް އެހީވުމަށްޓަކައި ޑިވެލޮޕްމަންޓް ފަންޑުގެ ތެރެއިން "މައިކްރޯ ލޯން" ތައާރަފްކުރުމަކީ އޭނާގެ މުހިންމު ސިޔާސަތެކެވެ.

ޒަރިޔަންދު އިތުރަށް ވިދާޅުވީ، މި ހުރިހާ ކަންކަމުގެ މާލީ ތަފްސީލުތަކާއި ހިސާބުތައް ހިމެނޭހެން ތައްޔާރުކޮށްފައިވާ އޭނާގެ ފުރިހަމަ މެނިފެސްޓޯ، އަންނަ މާރޗް މަހުގެ 15 ވަނަ ދުވަހުގެ ކުރިން ރައްޔިތުންނަށް ފެނިގެންދާނެ ކަމަށެވެ.