ލޯކަލް ކައުންސިލް އިންތިހާބަށް ވަގުތު ކުޑަތަން ވަމުން ދަނިކޮށް ރައީސް، ރައްޔިތުންތަކަކަށް ފައިސ ާބަހަން ނިންމި ނިންމުމަކީ ރިޝަވަތުގެ އަމަލެއް ކަމަށް މާލޭގެ މޭޔަރު ކަމަށް ވާދާ ކުރައްވާ ގައުމީ ކެންޑިޑޭޓު އިސްމާއިލް ޒަރިޔަންދު ވިދާޅުވެއްޖެއެވެ.
ރައީސް މުއިއްޒު ވަނީ މާލޭހިޔާއާ ސިނަމާލެ ފްލެޓުތަކުގެ ވެރިންނަށް 1 ލައްކަ ރުފިޔާ ދޭން ނިންމާފައެވެ. މުލިއާގޭގައި އެ ފްލެޓުވެރިންނާ ބައްދަލުކުރައްވާ އެމަނިކުފާނުވަނީ އެކަން ކަށަވަރުކޮށްދެއްވާފައެވެ.
އެ ބައްދަލުވުމުގެ ފޮޓޯއެއް ހިއްސާކުރައްވާ ޒަރިޔަންދު އެކްސްގައި ކުރެއްވި ޕޯސްޓެއްގައި ވިދާޅުވީ، ވޯޓާއި ދިމާކޮށް ފައިސާ ދެއްވަން ރައީސުލްޖުމްހޫރިއްޔާ ވެވަޑައިގަތް ވަޢުދަކީ "ކޮރަޕްޝަން"ގެ ޢަމަލެއްކަން އެނގެނީ، އިންތިޚާބުގައި ރައީސްގެ ފަރާތުން ވާދަކުރައްވާ "މޭޔަރ ކެނޑިޑޭޓް" އަދި "އަންހެން ރައީސާ" އާއި އެއްބަރިއެއްގައި އިންނަވައި އެހެން ވިދާޅުވުމުން ކަމަށެވެ.
ޒަރިޔަންދު އެފަދައިން ވިދާޅުވިއިރު، އެ ބައްދަލުވުމުގައި ކައުންސިލް އިންތިހާބުގައި ޕީއެންސީގެ ފަރާތުން މާލޭގެ އެކި ދާއިރާތަކަށް ކުރިމަތިލާ އެކި ކެންޑިޑޭޓުން ވެސް ބައިވެރިވެފައިވެއެވެ.
އަންނަ އެޕްރީލް މަހު ބާއްވާ ލޯކަލް ކައުންސިލް އިންތިހާބާ ދިމާކޮށް ސިނަމާލެ އާއި މާލެހިޔާ ފްލެޓްތަކުގެ ވެރިންނަށް އެއް ލައްކަ ރުފިޔާ ދޭން މުހައްމަދު މުއިއްޒު ނިންމެވި މައްސަލަ ރަސްމީކޮށް އެންޓި ކޮރަޕްޝަން ކޮމިޝަން (އޭސީސީ)އަށް ވެސް މިހާރު ވަނީ ހުށަހަޅާފައެވެ.
