ރައީސް ޑރ މުހައްމަދު މުއިއްޒު ގެންދަވަނީ އެމަނިކުފާނަށް ފަހިވާ ގޮތަށް މުޅި ނިޒާމު ބައްޓަން ކުރަމުން ކަމަށް ކުރީގެ ނައިބު ރައީސް އަދި ޕީއެންއެފްގެ ވެސް ނައިބު ރައީސް ޑރ މުހައްމަދު ޖަމީލު އަހުމަދު ވިދާޅުވެއްޖެއެވެ.
މާލޭގެ މޭޔަރު ކަމަށް ނުކުންނަވާ ގައުމީ ކެންޑިޑޭޓު އިސްމާއިލް ޒަރިަޔންދުގެ ކެމްޕެއިންގެ ޑޯޓުޑޯގެ ހަރާކާތުގައި ބައިވެރިވެވަޑައިގެން ޑރ ޖަމީލު ވިދާޅުވީ ކުރިއަށް ކައުންސިލް އިންތިހާބާ އެއްކޮށް ރެފްރެންޑަމް ވޯޓެއް ނަގަން އުޅޭ އިރު އެމަނިކުފާނު ރިޔާސީ އިންތިހާބުގައި ރައްޔިތުން ގާތު އެއްވެސް ވަރަކަށް ވެރިކަން ކުރުމަށް އޮތް ގާނޫނު އުނދަގޫ ވާހަކަ ނުވަތަ ކަމުނުދާ ވާހަކަ ވިދާޅުވެފައިނުވާ ކަމަށެވެ.
ނަމަވެސް ވެރިކަމަށް އައިސް ފެންނަމުން ދަނީ މުޅި ނިޒާމު ބަދަލު ގާނޫނު އަސާސީއަށް ވެސް ހިތު ހުރި ބަދަލުތަކެއް ގެނެސް ހުރިހާ ދިމާއެއް ރައީސް މުއިއްޒު ބޭނުންވާ ގޮތަށް ބަދަލުކޮށް މަޖިލިސްވެސް މުށު ތެރެއަށްލާ މުޅި ނިޒާމު ފުނޑާލާ މަންޒަރު ކަމަށް ޑރ ޖަމީލު ވިދާޅުވިއެވެ.
ޑރ ޖަމީލު އިތުރަށް ވިދާޅުވީ ރައީސް މުއިއްޒުގެ އިހުލާސްތެރިކަމެއް ނެތް ކަމަށާ އެހެންކަމުން މާލޭގެ މޭޔަރު ކަމަށް ގެންނަން ޒަރިޔަންދު ނޫން ޗޮއިސް އެއް ނެތް ކަމަށެވެ. ޑރ ޖަމިލު ވިދާޅުވީ ޒަރިޔަންދު ވެގެންދާނީ ޑރ މުއިއްޒު އެންމެ ޖެހިލުންވާނެ މޭޔަރަށް ކަމަށާ އެހެނީ ޒަރިޔަންދުގެ މޭޔަރުކަމެއްގައި ޑރ މުއިއްޒު މޭޔަރު ކަމުގައި ހުންނަވާ ހިންގެވި ޖަރީމާތައް ވެސް ބަލާނެކަމުގެ ޔަގީންކަން އޮތުމުން ކަމަށްވެސް ޑރ ޖަމީލު ވަނީ ވިދާޅުވެފައެވެ.
