ޕްރޮގްރެސިވް ޕާޓީ އޮފް މޯލްޑިވްސްއާ ރައީސް އަބްދުﷲ ޔާމީންގެ ހުސް ގޮނޑިއާ މެދު ރައީސް ޑރ މުހައްމަދު މުއިއްޒު ކަންކުރި ގޮތް، ރައީސް ޔާމީންގެ ބިނާކުރަނިވި ފިކުރަށް ތާއީދުކުރާ ހުރިހާ ރައްޔިތުންވެސް އަބަދުވެސް ހަނދާނުގައި ބަހައްޓަން ޖެހޭނެ ކަމަށް ކުރީގެ ނައިބު ރައީސް އަދި ރައީސް ޔާމީންގެ އިސް ގާނޫނި ވަކީލު ޑރ މުހައްމަދު ޖަމީލު އަހުމަދު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ އެކްސްގައި ކުރެއްވި ޕޯސްޓެއްގައެވެ.
ރިޔާސީ އިންތިހާބުގެ ދުވަސްވަރު، ރައީސް މުއިއްޒު ކެމްޕެއިން ތެރޭގައި ރައްޔިތުންގެ ތާއީދު ހޯދުމަށް، ރައީސް ޔާމީނަށް ވަފާތެރިއެއްގެ ގޮތުގައި ދެއްކުމަށް ގެންގުޅުނު ރަމްޒީ ގޮނޑި، "ހުސްގޮނޑީ"ގެ ފޮޓޯއެއް ހިއްސާ ކުރައްވާ ޑރ ޖަމީލު ވިދާޅުވެފައިވަނީ، އެ ހުސްގޮނޑިއާ ޕީޕީއެމްގެ ދުވަސް ދުއްވާލި މީހަކީ ރައީސް މުއިއްޒު ކަމަށެވެ.
އެހެންކަމުން ޕީޕީއެމްގެ ބިނާކުރަނިވި ފިކުރަށާ ރައީސް ޔާމީނަށް ތާއީދު ކުރާ އެންމެހާ ރައްޔިތުން ރައީސް މުއިއްޒު ފެންނަ ކޮންމެ ފަހަރަކު އެކަން ހަނދާން ކުރަން ގޮވާލާ ޑރ ޖަމީލު ވިދާޅުވެފައިވަނީ، ހަނދާންކޮށް ދިނުމަކީ މުއުމިނުންނަށް ފައިދާ ކުރާނެ ކަމެއް ކަމަށް ގުރުއާނުގައި ވަޙީކުރެވިފައިވާ ކަމަށެވެ.
ޑރ ޖަމީލު މިފަދައިން ވިދާޅުވެފައިވާއިރު، ރައީސް މުއިއްޒު ވެރިކަމަށް ވަޑައިގަތުމަށް ރައީސް ޔާމީންގެ ނަންފުޅާ އެމަނިކުފާނުގެ ޕާޓީ، ޕީޕީއެމްގެ މެމްބަރުންގެ ވޯޓު ބޭނުންކުރުމަށް ފަހު ވެރިކަމަށް ވަޑައިގެން ރައީސް ޔާމީން ފެއަށް ޖައްސަވާ ޕީޕީއެމްވެސް އުވާލެއްވީއެވެ.
