ރައްޔިތުންގެ މަޖިލީހުގެ ވެލިދޫ ދާއިރާގެ މެންބަރު މުހައްމަދު އައްބާސް، ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް ވަރަށް ހަރުކަށި އިބާރާތުން ފާޑުވިދާޅުވެ، މުއިއްޒަކީ މުސްލިމުންގެ އަދުއްވެއްގެ ގޮތުގައި ސިފަކުރައްވައިފިއެވެ.
މެންބަރު އައްބާސް މިފަދައިން ވިދާޅުވީ އޭނާގެ ރަސްމީ ފޭސްބުކް އެކައުންޓުގައި ކުރެއްވި ޕޯސްޓެއްގައެވެ. އޭނާ ވިދާޅުވި ގޮތުގައި ރައީސް މުއިއްޒު މިހާރު ކުރައްވަމުން ގެންދަވާ ކަންކަމަކީ އެންމެ ނުބައި ނުލަފާ މުނާފިގުން ކުރާނެ ފަދަ އަމަލުތަކެކެވެ.
މެންބަރުގެ ފާޑުކިޔުންތައް ބޮޑަށް އަމާޒުވެފައިވަނީ ބޭރުގެ އަސްކަރީ ކަންކަމާ ގުޅޭގޮތުންނެވެ. އެގޮތުން މުސްލިމުންނާ ދެކޮޅަށް ނުހައްގުން ކުރަމުންދާ ހަނގުރާމައެއްގައި ބައިވެރިވުމަށްޓަކައި، ދިވެހިރާއްޖޭގެ ބިމުން ކުޑަ މިންވަރެއް ނަމަވެސް ބޭނުންކުރުމުގެ ފުރުސަތު ދިނުމަކީ އެއްގޮތަކަށްވެސް ބަލައިގަނެވޭނެ ކަމެއް ނޫން ކަމަށް އޭނާ ފާހަގަކުރެއްވިއެވެ.
މީގެއިތުރުން، ޔަހޫދީން މުސްލިމުންނާ ދެކޮޅަށް ހިންގަމުންދާ ލާއިންސާނީ އަމަލުތަކާއި ހަނގުރާމައިގައި ރައީސް މުއިއްޒު ބައިވެރިވެވަޑައިގެންފައިވާ ކަމަށް ބެލެވޭނެ ޖާގަ އެބައޮތް ކަމަށްވެސް އައްބާސް ވަނީ ތުހުމަތު ކުރައްވާފައެވެ.
މެންބަރު އައްބާސްގެ މި ޕޯސްޓާ ގުޅިގެން ސޯޝަލް މީޑިއާގައި ބޮޑު ބަހުސެއް އުފެދިފައިވާއިރު، ގިނަ ބައެއްގެ ސަމާލުކަން މި މައްސަލައަށް ވަނީ ހުއްޓިފައެވެ.
