މާލޭ އިންޓަރނޭޝަނަލް އެއާޕޯޓަކީ ޓްރާންސިޓު ހަބެއް ނޫން ކަމަށް ޕީއެންއެފްގެ ސެކެރެޓަރީ ޖެނެރަލް މުހައްމަދު މަލީހު ޖަމާލު ވިދާޅުވެއްޖެއެވެ.
މަލީހު މިފަދައިން ވިދާޅުވީ، މިވަގުތު ގައުމަށް ނުފުރި ތިބި ޓޫރިސްޓުންނަށް އެކޮމޮޑޭޝަން ސަރުކާރުން ހަމަޖައްސަމުންދާ އުސޫލަށް ފާޑުވިދާޅުވެ ކުރެއްވި އެކްސް ޕޯސްޓެއްގައެެވެ.
މަލީހު ވިދާޅުވީ، އެމްއޭސީއެލްއިން މި ފުރުސަތުގައިވެސް ބަލަނީ ބޮޑު އަގުގައި ތަކެތި ގަނެވޭތޯ ކަމަށެވެ. ނަމަވެސް އެ ތަކެތި ގަނެ މާލޭ އެއަރޕޯޓްގެ ތަޅުންމަތީ ފަތުރުވެރިން ނިންދަވަން ނުޖެހޭކަން ފާހަގަކުރައްވާ މަލީހު ވަނީ ރާއްޖޭގެ ރިސޯޓްތަކުގައި އަދި ގެސްޓް ހައުސްތަކުގައި އަންއޮކިއުޕައިޑު ރޫމް ގިނައިން އެބަހުރި ކަން ފާހަގަކުރައްވާ ފްލައިޓް ހަމަޖެހެންދެން އެއިންތިޒާމް ހަމަޖައްސަން ގޮވާލާފައެވެ.
މީގެ އިތުރުން މަލީހު ވިދާޅުވީ އެއާލައިންތަކުން އިންޝިއުރެންސް ހަމަޖެއްސުމުގެ މާލީ ތަނަވަސްކަން ނެތް ފަރާތްތަކަށް ޓޫރިޒަމް ޓްރަސްޓު ފަންޑުން ކެއުމާއި ނިދުން ހަމަޖެއްސިދާނެ ކަމަށާ މާލެ އެއަރ ޕޯޓަކީ ޓްރާންސިޓް ހަބެއް ނޫން ކަމަށް ވިދާޅުވެފައެވެ.
މަލީހު މިފަދައިން ވިދާޅުވެފައިވާއިރު ސަރުކާރުން ވަނީ މޯލްޑިވިއަންގެ ކުރީގެ ލައުންޖުވެސް ފޮޅާ ސާފުކުރުމަށް ފަހު އެތަނުގައި ބައެއް ގެސްޓުންނަށް އެކމޮޑޭޝަން ހަމަޖއްސާފައެވެ. އެތަނުގައި ނިދުން ހަމަޖައްސަން ގޮދަނޑި ފަދަ ގަންނަމުންދާކަމަށް ރިޕޯޓުކޮށްފައިވެއެވެ.
