އިރާނުގެ ސަރުކާރުން ހޮރްމުޒް ކަނޑުއޮޅި ބަންދުކޮށްފައިވާކަން ރަސްމީކޮށް އިޢުލާންކޮށްފައި ވަނިކޮށް، ގަވާއިދާ ޚިލާފަށް އެ ސަރަހައްދަށް ވަން ތެޔޮ ޓޭންކަރަކަށް އިރާނުގެ އަސްކަރިއްޔާއިން ހަމަލާދީފިއެވެ.
މި ހާދިސާ ހިނގާފައިވަނީ މެދުއިރުމަތީގެ މަޝްރަހު އިންތިހާއަށް ހޫނުވެ، އިރާނާއި އިޒްރޭލާ ދެމެދު ސީދާ އަސްކަރީ ކުރިމަތިލުންތަކެއް ހިނގަމުންދާ ދަނޑިވަޅެއްގައެވެ. ރިޕޯޓްތައް ބުނާގޮތުން، އިރާނުން ހަމަލާދިން މި ޓޭންކަރަކީ ބައިނަލްއަގުވާމީ ކަނޑުގެ ގަވާއިދުތަކާ ޚިލާފަށް އަދި އިރާނުގެ އިންޒާރުތަކަށް ބެލުމެއްނެތި އެ ސަރަހައްދަށް ވަން އުޅަނދެކެވެ.
އިރާނުގެ އަސްކަރީ މަސްދަރުތަކުން ހާމަކޮށްފައިވާ ގޮތުގައި، ހޮރްމުޒް ކަނޑުއޮޅި ބަންދުކުރަން ޖެހުނީ އިޒްރޭލުން ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ ލާއިންސާނީ އުދުވާނާއި، އެމެރިކާއިން އެ ސަރަހައްދުގައި އިޒްރޭލަށް ވާގިވެރިވުމުގެ ގޮތުން ކުރިއަށްގެންދާ ހަރަކާތްތަކާ ގުޅިގެންނެވެ. އިރާނުން ބުނަމުންދަނީ އެ ގައުމުގެ ސަރަހައްދީ ރައްކާތެރިކަމަށް ބުރޫއަރާ ފަދަ އެއްވެސް އަމަލަކަށް ފުރުސަތު ނުދޭނެ ކަމަށެވެ.
މި ހަމަލާއާ ގުޅިގެން އެމެރިކާއާއި އިޒްރޭލުން ވަނީ ކަންބޮޑުވުން ފާޅުކޮށްފައެވެ. އެމެރިކާގެ ދިފާއީ ވުޒާރާއިން ބުނެފައިވަނީ މިއީ ބައިނަލްއަގުވާމީ ވިޔަފާރިއަށް ހުރަސްއެޅުމުގެ އަމަލެއް ކަމަށެވެ. ނަމަވެސް، އިރާނުން ތަކުރާރުކޮށް ބުނަމުންދަނީ އިޒްރޭލަށް ވާގިވެރިވާ ކޮންމެ ފަރާތަކަށްވެސް ހަރުކަށި ރައްދުދޭނެ ކަމަށެވެ.
ދުނިޔޭގެ ތެލުގެ ބާޒާރުގެ ބޮޑު ބައެއް ހިއްސާކުރާ ހޮރްމުޒް ކަނޑުއޮޅި ބަންދުކުރުމާއި، މިފަދަ ހަމަލާތަކުގެ ސަބަބުން ދުނިޔޭގެ ބާޒާރުގައި ތެލުގެ އަގު އުފުލިގެންދާނެ ކަމަށް އިގްތިސާދީ މާހިރުން ލަފާކުރެއެވެ.
