އީރާނުން އިޒްރޭލުގެ އާންމުން ދިރިއުޅޭ ސަރަހައްދުތަކަށް އަމާޒުކޮށް، ނުރައްކާތެރި ކްލަސްޓަރ ބޮން (ކުދިބޮން އެކުލެވޭ މިސައިލް) ބޭނުންކޮށްގެން ވަރުގަދަ ހަމަލާތަކެއް ދީފި ކަމަށް އިޒްރޭލު ސިފައިން ބުނެފިއެވެ. މި ހަމަލާތަކަކީ އާންމުންނަށް ބޮޑެތި ގެއްލުންތަކެއް ދިނުމުގެ މަގްސަދުގައި ދީފައިވާ ހަމަލާތަކެއް ކަމަށް އިޒްރޭލުން ވަނީ ތުހުމަތުކޮށްފައެވެ.
ސޯޝަލް މީޑިއާގައި މިހާރު ދައުރުވަމުންދާ ވީޑިއޯތަކުން ފެންނަ ގޮތުގައި، އިޒްރޭލުގެ އުޑުމަތިން ދަގަނޑު ބުރިތަކެއް ފަދައިން ގިނަ އަދަދެއްގެ ގޮވާތަކެތި ބިންމައްޗަށް އޮހެމުންދެއެވެ. މި މަންޒަރުތަކުން ފެންނަނީ ކްލަސްޓަރ މިސައިލްތައް ވައިގެ ތެރޭގައި ގޮވައި، އޭގެ ތެރެއިން އެތައް ކުދި ބޮންތަކެއް ވަކިވެ، ބޮޑު ސަރަހައްދަކަށް ފެތުރިގެންދާ މަންޒަރެވެ.
އިޒްރޭލުގެ އަސްކަރިއްޔާގެ ތަރުޖަމާނު ލެފްޓިނެންޓް ކާނަލް ނަދާވް ޝޯޝާނީ މިކަމާ ގުޅޭގޮތުން ވިދާޅުވީ، އީރާނުން މިފަދަ ނުރައްކާތެރި ހަތިޔާރު ބޭނުންކުރަނީ ގިނަ އަދަދެއްގެ އާންމުން މަރައި، އާންމު އާބާދީތަކަށް ބޮޑެތި ގެއްލުންތަކެއް ދިނުމުގެ ނިޔަތުގައި ކަމަށެވެ. މައުލޫމާތު ލިބޭ ގޮތުގައި އީރާނުން ފޮނުވާލި ކްލަސްޓަރ މިސައިލްތަކުގެ ކޮންމެ ބޮލަކުން ގާތްގަނޑަކަށް 20 ވަރަކަށް ކުދި ބޮން ވަކިވެ، ވަރަށް ފުޅާ ދާއިރާއެއްގައި ގޮވުންތައް އުފައްދައެވެ.
މި ހަމަލާތަކުގައި އިޒްރޭލުގެ ބެއިޓް ޝެމޭޝް އަދި ވިޔަފާރީގެ މަރުކަޒީ ސިޓީ ކަމަށްވާ ތެލް އަވީވް ފަދަ ސަރަހައްދުތަކަށް ބޮޑެތި ގެއްލުންތަކެއް ލިބިފައިވެއެވެ. މިހާތަނަށް ލިބިފައިވާ ރިޕޯޓްތަކަށް ބަލާއިރު، ބެއިޓް ޝެމޭޝްއިން އެކަނިވެސް ވަނީ ނުވަ މީހަކު މަރުވެފައެވެ. އަދި ގިނަ އަދަދެއްގެ ބަޔަކަށް އެކި ވަރުގެ އަނިޔާތައް ލިބިފައިވާ ކަމަށްވެސް ރިޕޯޓްތައް ބުނެއެވެ.
