އީރާނުގެ ކުރީގެ ރޫޙާނީ އެންމެ މަތީ ވެރިޔާ އާޔަތުﷲ ޢަލީ ޚާމަނާއީގެ އަނބިކަނބަލުން މަންޞޫރާ ޚުޖަސްތާ ބާޤިރުޒާދާ މިއަދު އަވަހާރަވެއްޖެ ކަމަށް އެ ޤައުމުގެ ރަސްމީ މީޑިއާއިން ރިޕޯޓްކޮށްފިއެވެ.
މަންޞޫރާ ޚުޖަސްތާ އަވަހާރަވީ މިދިޔަ ހޮނިހިރު ދުވަހު އިސްރާއީލާއި އެމެރިކާގެ އަސްކަރީ މަތިންދާބޯޓުތަކުން އީރާނަށް ދިން ވަރުގަދަ ވައިގެ ޙަމަލާތަކުގައި ލިބުނު ސީރިއަސް އަނިޔާތަކަށް ފަރުވާ ދެމުންދަނިކޮށް މިއަދުގެ ވަގުތެއްގައެވެ.
މިދިޔަ ހޮނިހިރު ދުވަހު ތެހެރާނަށް ދިން މި ޙަމަލާތަކުގައި އީރާނުގެ ރޫޙާނީ އެންމެ މަތީ ވެރިޔާ ޢަލީ ޚާމަނާއީ ވެސް ވަނީ އަވަހާރަވެފައެވެ. މީގެއިތުރުން، އެމަނިކުފާނުގެ އާއިލާގެ ގިނަ ބޭފުޅުންތަކެއް ވެސް މި ޙަމަލާތަކުގައި ޝަހީދުވެފައިވެއެވެ. އޭގެ ތެރޭގައި އެމަނިކުފާނުގެ އަންހެން ދަރިކަނބަލަކާއި، ދަނބިދަރިކަލަކާއި، ކާފަ ދަރިކަލެއްގެ އިތުރުން ޅީދަރިކަނބަލަކު ހިމެނެއެވެ.
1947 ވަނަ އަހަރު އީރާނުގެ މަޝްހަދަށް އުފަންވެވަޑައިގަތް މަންޞޫރާ ޚުޖަސްތާ ބާޤިރުޒާދާ އަކީ ދީނީ ގޮތުން ނުފޫޒުގަދަ އަދި އިޙްތިރާމް ލިބިގެންވާ ބޮޑު ޢާއިލާއަކަށް ނިސްބަތްވެވަޑައިގަންނަވާ ބޭކަނބަލެކެވެ. އެކަމަނާ ޢަލީ ޚާމަނާއީއާ ކައިވެނި ބައްލަވައިގަތީ 1965 ވަނަ އަހަރުއެވެ. މި ދެމަފިރިންނަށް ހަ ބޭފުޅުން ލިބިވަޑައިގެންފައިވެއެވެ. އެއީ ހަތަރު ފިރިހެން ބޭފުޅުންނާއި ދެ އަންހެން ބޭފުޅުންނެވެ.
އިސްރާއީލާއި އެމެރިކާ ގުޅިގެން ދިން މި ނުރައްކާތެރި ޙަމަލާތަކުގެ ސަބަބުން އީރާނުގެ އެންމެ މަތީ ލީޑަޝިޕްގެ އާއިލާއަށް ވަނީ ބޮޑު ހިތާމައަކާ ކުރިމަތިލާން ޖެހިފައެވެ.
