އެމެރިކާއާއި އިސްރާއީލް ގުޅިގެން އީރާނަށް ދެމުންދާ ލާއިންސާނީ ހަމަލާތަކުގެ ބަދަލުހިފުމުގެ ގޮތުން، ސައުދީ އަރަބިއްޔާގެ ވެރިރަށް ރިޔާޟުގައި ހުންނަ އެމެރިކާގެ އެމްބަސީއަށް އީރާނުން ވަރުގަދަ ޑްރޯން ހަމަލާތަކެއް ދީފިއެވެ.
ސައުދީ އަރަބިއްޔާގެ ދިފާއީ ވުޒާރާއިން ކަށަވަރުކޮށްދީފައިވާ ގޮތުގައި، ދެ ޑްރޯން ބޭނުންކޮށްގެން ދިން މި ހަމަލާއާ އެކު އެމްބަސީގެ އިމާރާތުގައި ވަނީ އަލިފާން ރޯވެފައެވެ. ސައުދީގެ ދިފާއީ ވުޒާރާގެ ތަރުޖަމާނު ވިދާޅުވި ގޮތުގައި، މި ހަމަލާ އަމާޒުވި އިމާރާތަށް ވަނީ ގެއްލުންތަކެއް ލިބިފައެވެ. ނަމަވެސް މި ހާދިސާގައި އެއްވެސް މީހަކަށް އަނިޔާއެއް ލިބިފައިވާ ކަމުގެ ރިޕޯޓެއް އަދި ލިބިފައެއް ނުވެއެވެ.
މި ހަމަލާއަކީ އީރާނުގެ ރޫހީ މީޑަރު އާޔަތުﷲ އަލީ ޚާމަނާއީ އާއި އެމަނިކުފާނުގެ އާއިލާގެ ބޭފުޅުން، އެމެރިކާއާއި އިސްރާއީލުން ދިން ފިނޑި ހަމަލާއެއްގައި އަވަހާރަކޮށްލުމާ ގުޅިގެން ދިން ރައްދެކެވެ. އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ވަނީ، މެދުއިރުމަތީގައި ހުރި އެމެރިކާގެ "ސިޔާސީ ސެންޓަރުތައް" ނައްތާލުމުގެ ބޮޑު އޮޕަރޭޝަނެއް ފަށާފައިވާކަން އިއުލާނުކޮށްފައެވެ.
މިދިޔަ ހޮނިހިރު ދުވަހުން ފެށިގެން އެމެރިކާއާއި އިސްރާއީލުން އީރާނަށް ދެމުންދާ ވަރުގަދަ ވައިގެ ހަމަލާތަކުގައި އީރާނުގެ 500 އަށްވުރެ ގިނަ މީހުން ވަނީ ޝަހީދުވެފައެވެ. އީރާނުގެ ގައުމީ ސަލާމަތާއި ކަރާމާތަށްޓަކައި ދެމުންދާ މި ރައްދު ހަމަލާތަކުގައި މިހާތަނަށް އެމެރިކާގެ ހަ ސިފައިން މަރުވެފައިވާއިރު، އިސްރާއީލުގެ 10 މީހަކު ވަނީ މަރާލާފައެވެ.
މަސްރަހު ދިރާސާކުރާ ފަރާތްތަކުން ބުނާ ގޮތުގައި، އީރާނުގެ ލީޑަޝިޕަށް އަމާޒުކޮށް އެމެރިކާއިން ހިންގި ޖަރީމާއަށްފަހު، މެދުއިރުމަތީގައި ހުރި އެމެރިކާގެ މަސްލަހަތުތަކަށް އޮތް ނުރައްކާ މިވަނީ އިންތިހާއަށް ބޮޑުވެފައެވެ.
