އިޒްރޭލުން އިރާނަށް ދެމުންދާ ހަމަލާތަކާއި، އީރާނުގެ އިސްތިގްލާލަށް އަރައިގަނެ މުސްލިމް ލީޑަރަކު ޝަހީދުކޮށްލި ހާދިސާއާ ގުޅިގެން ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަމަލުކުރައްވާ ގޮތަށް ޕީއެންއެފްގެ ނައިބު ރައީސް ޑރ. މުހައްމަދު ޖަމީލް އަހުމަދު ވަރަށް ބޮޑަށް ފާޑުވިދާޅުވެއްޖެއެވެ.
އެކްސްގައި ކުރެއްވި ޕޯސްޓެއްގައި ޑރ. ޖަމީލް ވިދާޅުވީ، އިޒްރޭލުގެ އުދުވާނާ މެދު ބަސްބުނުމުގައި ރައީސް މުއިއްޒުގެ ކިބައިން ފެންނަނީ ހިތުގައި ވަކި އެއްޗެއް ބާއްވައިގެން، ދުލުން ބަސް ބުނަން އުނދަގޫވެގެން އުޅޭ މަންޒަރު ކަމަށެވެ. އެއްވެސް ހައްގަކާ ނުލައި އީރާނުގެ ސޮވެރިނިޓީއަށް އަރައިގަނެ، މުސްލިމް ލީޑަރަކު ޝަހީދުކޮށްލުމަށް ވުރެ ބޮޑު ކުށެއް ނޯންނާނެ ކަމަށާއި، އިޒްރޭލުގެ މި އަމަލު ހަރުކަށި އިބާރާތުން ކުށްވެރިކުރުމަކީ އިންސާނިއްޔަތާއި ދީނީ ގޮތުން މިއަދު ކުރުން ވާޖިބު ކަމެއްގެ ގޮތުގައި ޖަމީލް ފާހަގަކުރެއްވިއެވެ.
މެލޭޝިއާގެ ބޮޑުވަޒީރު އަންވަރު އިބްރާހިމް ކުރެއްވި ޕޯސްޓަކަށް އިޝާރާތް ކުރައްވައި ޖަމީލް ވިދާޅުވީ، މެލޭޝިއާ އާއި ޕާކިސްތާނުގެ ވެރިން އެ ސަރަހައްދާ އޮތް ގުޅުމުގެ ބޮޑުކަމުން ރައްޔިތުންގެ ހައްގުގައި ފާޅުގައި ބަސްބުނެފައިވާ ކަމަށެވެ. ނަމަވެސް ރައީސް މުއިއްޒު މިކަމުގައި ހަނި ފުރުސަތެއް ހޯއްދަވައިގެން އުޅުއްވާތީ، އެކަމާ މެދު އަމިއްލަ ނަފުސަށް ލަދުގަނޭތޯ ޖަމީލް ވަނީ ސުވާލު ކުރައްވާފައެވެ.
"ތިޔަ ކުރަނީ ވެރިކަމެއް ނޫން. ތިޔައީ ރައްޔިތުންގެ މުސާރަ އާއި އިނާޔަތުގައި ގާފިލުވެގެން ތިއްބެވުން،" ރައީސް މުއިއްޒަށް އަމާޒުކުރައްވައި ޑރ. ޖަމީލް ވިދާޅުވިއެވެ.
މި ސަރުކާރުން އިޒްރޭލުގެ މައްސަލައިގައި ގެންގުޅޭ ސިޔާސަތަށް އިދިކޮޅު ފަރާތްތަކުންނާއި އާންމުންގެ ގިނަ ބަޔަކު އަންނަނީ ފާޑުކިޔަމުންނެވެ.
